٥ أماكن بلبنان جمالها ما بيتصدق

أكيد بتعرف إنو بلدنا كتير حلو! ما تضيعوا الفرصة لزيارة بعض من هالمناطق الخلابة، يلي أكيد رح تعجبكن.

١- القرنة السودا، الشمال:

أعلى قمة بلبنان والشام. مش هين أبدا توصلوا لارتفاع ٣٠٨٨ متر فوق البحر. هونيك رح تتعرفوا عجمال الطبيعة اللبنانية الحقيقي. رح تتمتعوا من هالنقطة الشاهقة برؤية بانورامية شاملة لكل لبنان وسوريا وحتى قبرص لما يكون الطقس حلو. الوصول للقمة تجربة مليانة حماس وتحدي، خاصة عبر طرقات الداخل المغمورة بالتلج. أما إذا كنتوا مش من هواة هيك مغامرات، فرحلة بالطريق العام رح ترضيكن أكيد.

٢- بحيرة القرعون، البقاع:

بأقصى جنوب وادي البقاع، هوي البحيرة الاصطناعية الوحيدة بلبنان. تم إنشاءا سنة ١٩٥٩ بعد بناءأكبر سد بنص نهر الليطاني. بيستخدم هالخزان لتوليد الكهربا والسقاية وبيئوي حوالي ٢٠،٠٠٠ طائر مهاجر بزوروه كل سنة. فيكن تقضوا ليلتكن بواحد من الأوتيلات الجميلة المنتشرة على الطرقات المؤدية للبحيرة وتاخدوا الغدا بمطعم سمك. الفكرة الأروع هي إنكن تستأجروا شختورة وتروحوا برحلة لتكتشفوا البحيرة وتشاهدوا الصيادي.

٣- بالوع بعتارة، تنورين:

مشهور كمان باسم بالوع بلعة. هوي فخت عملاق بقطر ٢٥٠ متر صنعتو الطبيعة. من أكتر المناطق الهادية ضمن الأرجاء اللبنانية الخلابة. بيتخللوا تلت جسور طبيعية كمان. فصل الربيع هوي أفضل توقيت لزيارة هالمعلم الغريب. مع دوبان التلوج، بيدفق شلال من ارتفاع ١٠٠ متر وبصب بأسفل الهضبة ععمق بيوصل لـ ٢٤٠ متر، من خلال الثقوب الكبيرة التلاتة يلي بتلحق بعضا. مكان ولا أروع للبيك – نيك، للتخييم، لممارسة رياضة المشي، وإذا قلبكن قوي كفاية وبتحبوا المغامرة فيكن تمارسوا رياضة التجذيف برفقة مجموعة من المغامرين القوايا متلكن.

٤- مغاور البترون البحرية:

البترون غنية بالمغاور البحرية المخفية، وأماكن مرتفعة رح تخلي الشك بالمي مغامرة كلا مرح للأصحاب هالهواية. روحوا صوب المنطقة الصخرية عالشمال، واكتشفوا شو مخبي هالشط الرائع. رح تتفاجؤا ببحيرات المي فيا بتلمع متل المرايا. فيكن تقضوا يوم كامل هون بدون ما تشعروا ولا لحظة بالملل. أهم شي تاخدوا معكن برنيطة وشمسية، أكل، عدة الغطس وأكيد السيلفي ستيك.

٥- أرز جاج، جبيل:

من أقدم وأشهر غابات الأرز بلبنان، معروفة كمان باسم أرز الرب. بترتفع ١،٥٠٠ متر عن سطح البحر وبتتألف من ٣٧٥ شجرة بتتراوح أعمارا بين الـ ١،٢٠٠ والـ ٢،٠٠٠ سنة. فيكن تمتعوا نظركن كمان بمشاهدة تشكيلات الصخور الكاريستية: بتاخد العقل! رح تضطروا تمشوا ساعات قبل ما تشوفوا أحلا الأشجار لطالعة من بين الصخور العتيقة والواصلة للسما، بس لما توصلوا رح تعرفوا إنو رحلتكن كانت بدون شك حرزانة. فيكن كمان تكتفوا ببيك – نيك بفي هالشجرات الخالدة والمجيدة.

ترجمة: رنا قاروط