١٦ نوع حلويات ووجبات خفيفة متواجدين ببيت كل تيتا

أنواع الحلو كتيرة ومتنوعة ولكل واحد منا اشيا بفضلا وبياكلا بأوقاتو المميزة. مع هيدا وكلو، ولو كبرنا، بضل “الشي الطيب” عند التيتا غير شكل وإلو طعمتو الخاصة. خلينا نعترف إنو التيتيات عكل الأراضي اللبنانية وبالبلدان المجاوارة متهمين بجريمة وحدي: بيحشونا أكل كل مرة منروح نزورن!

بكل زاوية ببيت التيتا ضروري نلاقي شي طيب، مشوا معي نشوف شو عندا.

١. “شوكو برنس” شغل البيت:

سهل وبسيط وأطيب وصفة ممكن تنعمل بالمطبخ. خلينا نذكر إنو بالإنكليزي إسمو بكل بساطة “لايزي كايك”.

٢. كاسترد:

سادة، أو طبقتين مع وحدي رقيقة عشوكولا، وأمرار مزين بحبة بسكوت، إنتو كيف كيف بتفضلو يكون شكل كاستكن؟

٣. جلو:

تحضيرو أهين من للايزي كايك. علبة من بودرة الجلو، كباية مي باردة، ووحدي سخنة: وهيك هالحلو السريع جاهز. مع شوية موز أو تفاح مقطع، حيلة مهضومة ليخلونا ناكل فواكه.

٤. رز بحليب:

ممممم شو بحبو. وكأن هلأ عم شم ريحتو بكل البيت هوي وعم ينطبخ عالغاز. مع رشة فستق حلبي مطحون عالوج، ولا أطيب!

٥. بسكوت تلت خمسات:

متل ما شفنا، هوي بيدخل بتحضير حلويات بيتية كتيرة، بس بنفس الوقت مين ما بيستحلي ياخد كم حبي ويقرمشن هيك سادة، بلا شي؟

٦. بسكوت وراحة:

البسكوت الشهير نفسو مع قطع الراحة الطرية عمسكة أو ورد، حسب الذوق، مغطاية ببودرة السكر. طعمة ناعم… بس فيه كتير سحر!

٧. ملبس لوز:

عم بحكي عن البنوبونيير القزاز الزغيرة عطاولة الصالون. رفعوا الغطا وبلشوا نقودوا من هالحبوب الملونة أزرق وأبيض وزهر فاتح. كل مرة بشوفن، بتذكر إيام التهناية لما ولدت إمي خيي الزغير.

٨. كعك القرشلي:

مثالي مع الشاي، أو العصير، بأي وقت من النهار.

٩. دبس وطحينة:

لما تنقطعوا من كل شي طيب بالبيت ما إلكن إلا ترجعوا للجذور، تجيبوا مرطبان هالدبس، ومرطبان هالطحينة، وتخلطوا شوي بشوي بكاسة قزاز. غمسوا الخبز العربي بهالمزيج الرائع، واستمتعوا بكل لقمة. ما في بيت لبناني بدون دبس وطحينة، وإلا كارثة! ما كنت حبو أنا وزغير، بس ارجعت اكتشفتو عكبر وصار وحدي من التحلايات المفضلة عندي بعد الغدا.

١٠. تشكيلة المربة:

مربى الدلال!

١١. قمرالدين:

كانت تيتا تقطع شقفة وتلفلي ياها متل العروس، بعدين تغلف النص التحتاني بورق الألومينيوم لما دبٌّق إيديي. بعدني بعمل نفس الشي، بس أكيد استغنيت عن ورقة الألومينيوم.

١٢. حلاوة:

نحنا بالفعل محظوظين! عطول في علبة حلاوة بخزانة المطبخ.

١٣. منتجات غندور:

أونيكا ودبكة هني دايماً المفضلين عند الكل!

١٤. الأصناف الغريبة العجيبة يلي ما بتشوف منا إلا هون:

شي متل هول، مثلاً. تيتا، مين وين بتجيبيهن؟

١٥. شوكولا سنة الـ 1900 وخشبة

هول يلي بيبقوا صرلن زمان محطوطين عجنب.

١٦. علبة البسكوت عزبدة:

آه… من زمان صارت لضب عدّة الخياطة.

ترجمة: رنا قاروط