٦ مراكز لتعلم اللغة الأجنبية بمتعة ببيروت

يمكن ما كتير يجذبكن العنوان إذا شي مرة كنتوا مجبورين تتابعوا دروس إضافية للغة بالمدرسة أو الجامعة. يمكن مهتمين، بس ما عندكن الوقت الكافي لتروحوا تحضروا صفوف. ويمكن في منكن عم يتسألوا هلأ: ” عن جد لشو؟ نحنا أصلاً منعرف لغتين ومش بحاجة لأكتر.”

أكيد رح تستفيدوا إذا تعلمتوا لغة تانية جديدة، وتالتة ورابعة كمان. لما تعرفوا عدة لغات رح تتميزوا بعالم التجارة والأعمال خاصة إذا عندكن طموح تصيروا جزء من السوق العالمية ، رح توسعوا معرفتكن وتغنوها بكل الأحوال ورح تنفتحوا على الآخر، المختلف، من بعد ما تتعرفوا عثقافتو وطريقة تفكيرو.

الموافقين على هالأفكار رح يسألوا: “طيب أي لغة لازم نتعلم، ووين ؟ خلونا نستعرض هون ستة من افضل المراكز يلي مننصحكن ما تتردوا لتتسجلوا فيا.

١- بيرليتز لانغويتش سنتر:

هوي بالحمرا، وواحد من ٥٠٠ مركز موزعين عـ ٧٠ بلد بالعالم. فيكن تدرسوا اللغة الأجنبية لتقووا قدراتكن بالتجارة، للمتعة بس أو حتى للسفر. فيكن تختاروا بين الصفوف الخاصة، النص خاصة أو مع مجموعة بالإضافة لبرنامجن يلي بيسمح بالدمج الشامل. بوفر المركز اللغة العربية، الإنكليزية، الفرنسية، الألمانية، الإيطالية والإسبانية.

٢- أميريكان ليبانيز لانغويتش سنتر – إنترناشونال هاوس (آي. أل. أل. سي):

هالمركز بعلم اللغات من خلال ٨ مستويات بتبلش مع المبتدئين وبتوصل للكفاءة العامة. بيعطوا ساعتين أو تلاتة بالأسبوع عفترة بتتراوح من شهرين لتلاتة. بوفر المركز اللغة الصينية، الألمانية، الإسبانية الإيطالية والفرنسية.

٣- أميركان ليرنيغ سنتر (آي. أل. سي):

من أولويات الآي. أل. سي. يخليكن تتقنوا كل مهارات اللغة الإنكليزية بامتياز. هوي بقدم دورات لـ “اللغة الإنكليزية للأعمال” و “اللغة الإنكليزية للأهداف المتخصصة”. بوفر المركز، باللإضافة اللغة اللإنكليزية، الفرنسية، اللإسبانية والعربية (المحكية والفصحى).

٤- معهد غوتيه:

إذا عم بتخطوا لتتعلموا اللغة الألمانية أو بتعرفوا شوية ألماني وبدكن تعرفوا أكتر، معهد غوتيه هوي بدون شك المطرح يلي عم بتفتشوا عليه. السيستيم عندن بيسمحلكن تشاركوا بالدورات العامة بشكل مكثف أو على مدى طويل، حسب شو بناسبكن. فيكن تستفيدوا كمان من دروس “اللغة الألمانية للأعمال” أو حول مواضيع تانية مختصة.

٥- معهد سيرفنتس:

هون مش بس بتتعلموا اللغة الإسبانية، رح تكونوا سعيدين إنكن تكتشفوا جوانب مختلفة من ثقافة هالبلد الحلو. البرنامج بيتضمن المسرح، الموسيقى، الرقص، الأدب، فن العمارة، وغيرا من الفنون المتنوعة… من خلال المشاركة بنشطات حيّة مفتوحة عالجمهور.

٦- المعهد الإيطالي للثقافة:

أفضل طريقة لتتحضروا لرحلة عإيطاليا هي إنكن تتعلموا اللغة الإيطالية وتتذوقوا ثقافتا العريقة بمعهدن الخاص. رح يكون عندكن الفرصة تشاركوا بمجموعة نشاطات ولا أروع. عم نحكي عن: معارض، حفلات موسيقية وندوات حول أفلام. رح تحسوا حالكن صرتوا بميلانو إنتوا وبعدكن ببيروت.

ترجمة: رنا قاروط