٧ مطاعم جبلية ساحرة بلبنان

الجبال اللبنانية هي الجزء الساحر والهادي من بلدنا. كيف فيكن تتمتعوا بهالنعمة للآخر؟ أكيد مع الكاس واللقمة الطيبة. منقدملكن هون ليستة المطاعم الجبلية المفضلة عنا: ١. تلة نصر هوي ببكفيا، النعص. بتحيطوا أشجار الصنوبر المجيدة. متخصص بالمطبخ اللبناني وأكلو بطير العقل. من خلالو فيكن تطلوا عمشهد بانورامي رائع لكل المنطقة. القعدة عندو من العمر! العنوان: بالقرب من مطعم فاضل، النعاص، بكفيا ٢. تيليغراف بيل- فو هالويك- أند، إنتو أكيد بتستاهلوا هَوايات بحمدون الحلوين. خلوا نظركن يسرح لبعيد صوب الوديان يلي بتشتهر فيا المنطقة. تلذذوا بالأكل الشهي وسط قعدة أنيقة وبين الأشجار الخريفية العالية. العنوان: الطريق العام، بحمدون ٣. منير هوي من الكلاسيكيات اللبنانية. العيل والأصحاب بيقصدوا عمدار السنة كاملة. ما حدا بيقدر ينافسوا بجودة الخدمة وأجواء البسط الغير شكل. العنوان: الطريق العام، برمانا ٤. الفردوس جوهرة إهدن المخفية. عمرو 50 سنة. بتملكوا عيلة بتدير بالها عضيوفا متل بالبيت. هونيك رح تكتشفوا أطيب كبة مشوية دايقينا بحياتكن. العنوان: نبع مار سركيس، إهدن ٥. مطعم لو بيشيه بأوتيل لو سيدروس عطريق الأرز الرئيسية، هالمحل من أفضل المطاعم بالمنطقة. عدا إنو من المنتجعات الفخمة، هوي خيار ممتاز ليلي بحبوا القعدة المكنكنة واللقمة المميزة بجودتا. العنوان: الطريق العام الأرز ٦. طاولة عميّق المكونات عطول طازة، المناظر ولا أجمل، وفريق العمل كتير حبوب ولطيف: ما بينشبع من كل شي هون. هالمطعم هوي فرع لسوق الطيب بالبقاع الغربي. العنوان: القرية القديمة العميق، البقاع الغربي ٧. جلسة العرزال إنتو وجواتو، بفاريا، رح تحسوا حالكن كأنكن ببيت بنص الغابة… متل بالقصص… ومع أطباقو اللبنانية التقليدية الشهية، هالمحل بيستاهل يكون عراس الليستا. العنوان: اوتستراد فاريا، فاريا ترجمة: رنا قاروط