أنواع سهرات رأس السنة اللبنانية

بتتعدد الأسباب اللّي بتخليك، كلبناني، تتحمس على ليلة رأس السنة. ممكن يكون الأمل ببداية سنة جديدة هدف الحماس وممكن قرارات بتحسنلك حياتك تكون الدافع لتنطر هيدي الليلة، ويمكن تكون موعود بزودة معاش. أو بكل بساطة محمس تعرف شو مخبيلك برجك للعام الجايي أو شو متوقعة ليلى عبد اللطيف.

متل ما بتختلف آراءنا بهالمناسبة، بتختلف كمان طرق الاحتفال بسهرة راس السنة.

١- سهرة الفنان

إن كان فنان Class A بأوتيل خمس نجوم أو فنان صاعد ورقاصة بمطعم، في عدد كبير من اللبنانية بيهِمُن هيك نوع سهرات. هيك بيحبوا يبلشوا العام الجديد.

٢- الClub

السهرات الاسبوعية بالملاهي الّليلية ما بتتوقف ليلة رأس السنة، بالعكس بيزيد انتاجن بما انو بتزيد تسعيرتن بسبب البرنامج الخاص اللي مجهزينه كرمال هالمناسبة (بأغلب الأوقات السهرة ما بتفرق عن السهرات المعتادة غير بتوزيع الكوتييون والعد العكسي قبل الساعة ١٢… وأكيد ما مننسى أغنية ABBA الشهيرة هابي نيو يير).

٣- Pub hopping

كتير أشخاص ما بيحبوا ينحصروا بمكان واحد ليلة راس السنة، بفضلوا ينزلوا عالشارع وينطوا من pub لpub بلا ما يقيدوا حالهن.

٤- جَمعِة بيت

والله يعينو الرفيق اللي اتفقوا يعملوا راس السنة عندو، لأن بيته رح يتحول لمستشفى مجانين خلال كم ساعة.

٥- تلفزيون مع العيلة

سهرة خفيفة نظيفة مع العيلة بالبيت، شوية معجنات مع تبولة وبطاطا مقلية وبزورات. بين الأبراج للسنة الجديدة على محطة والوصلات الغنائية على غير محطة وبرنامج الألعاب… بتخلص السهرة.

٦- المسافر

مش مهم اذا على اسطنبول، باريس، أو برلين المهم اي مكان خارج ال١٠٤٥٢ كم٢ على راس السنة.

٧- أحلى عالم

الألكول من أحلى عالم وأحلى كزدورة بشوارع بيروت بنص الليل، وأول ما تصير الساعة ١٢ منفلت عالزمامير "هيك منعبر عن فرحتنا".

٨- club فرشة

ببساطة فكرة راس السنة ما بتهمن… فقرار النوم بكون الأنسب لأنها ليلة متل اي ليلة تانية.