سافروا بلبنان: هيك كانت العطلة ب دير القمر

لما منفكّر انّو بدنا ناخد عطلة لنرتاح من هموم الحياة وضغط الشغل منفكّر بسفرة برّا لبنان، بس دايماً مننسا انّو عنّا بلبنان في كتير مناطق خلّابة من طبيعة لأنهار وجبال. بالويك أند من أسبوع قررنا نقضّي وقت أنا ورفقاتي بعيد عن الهموم. مشينا الصبح من بيروت وتروّقنا أطيب كعك عند أبو عرب عخلدة. أخد المشوار ساعة ووصلنا ع بيت الدين. فتنا تقرّجنا عالقصر من جوّا وبرّا، وهيدا كان أحلى قصر أثري لبناني شايفو. من بعدا رجعنا ع أوتيل بيت القمر بدير القمر، وبهيدا الأوتيل ما فيكن ما تحسّوا حالكن ببيتكن من الترحيب للديكور للنضافة والتعامل المميّز من كل يلي هونيك. قضّينا السهرة ب أوضة كبيرة مشتركة للزوار فيها آلات موسيقى وأفلام سينيما نحضرن عالشاشة الكبيرة، أو حتّى فينا نستعمل الإنترنت ونحضر شي تاني إذا بدنا شي مش موجود عندن. فقنا الصبح عصوت العصافير وبس. ما في ولا صوت تاني بالمنطقة، كتير رواق مع منظر كتير حلو من الأوضة. نزلنا عالمطعم وشفنا الطاولة مليانة بألوان الأكل اللبناني وكانت كتير بتشهّي، وطعمتها متل شكلها. خلّصنا الترويقة وقضّينا باقي النهار بالحديقة الكبية يلي ما بينشبع منها مع الهوا النقي والهدوء. صارت الساعة ١٢ وصار لازم نفلّ. كانت تجربة ما بتتفوّت مع جمعة حلوة من الأصدقاء بنصح الكل يجربوها. فيكن تتصلوا فيهن للمزيد من المعلومات على: ٤١١ ٦٦١ ٠٣