١٢ شغلة بيعملوها اللبنانية كل الأجانب بيعتبروها جنون

فينا نقول إنو الشعب اللبناني هو شعب غريب بكتير أشيا… كتير غريب لدرجة إنو أمرار منبيّن مجانين بالنسبة للأجانب. تحت رح نقلكن من أكتر الأشيا لبتخلّينا نبيّن هيك:

١. منودّع بعض ١٥ مرة قبل ما نسكّر التلفون

ودايمًا منتذكّر شو كنا بدنا نقول بس نقرر نسكّر، فمنرجع منسحبا ١٧ ساعة زيادة.

٢. عشا أهلنا ما بيخلص

مش بس إنو تقعد معن. لا، كمان ما رح تخلص من الأكل. رح تقضّيها أكلة، ورا أكلة، ورا أكلة. عشان هيك الأكل اللبناني مشهور بالعالم وكمان عشان هيك الرجال اللبنانية مشهورين بالكرش.

٣. منهين الناس لنعبّرلن عن حبنا ومنسبّن، ومنخترع أسماء إلن لنعمل مشكل.

“يلعن اختك شو بحبك”

٤. منحوّل كل شي لمزحة

مشاكل اجتماعية؟ حكومة فاسدة؟ عاصفة تلج؟ انفجار؟ لو شو ما كان الوضع، النكتة دايمًا حاضرة.

٥. منبوس ٣ مرات بس نسلّم عحدا، ومنرجع منبوسن ٣ مرات لنودّعن

إذا بست حدا مرتين ورجعت لورا، رح تلاقيه شدّك لعندو ليبوسك بوسة تالتة، أو رح تقضّي ١٠ ثوان غريبة أنت وعم تحاول ترجع لورا وتخلص منو.

٦. الأعراس

ما في شي بالعالم بيشبه العرس اللبناني. من الساعات لمنقضّيها عند الكوافير، لدخلة العروس، للزفّة، لعزيمة الأقارب البعاد لما شايفينن بحياتنا. يا بتجي عالعرس مزبّط حالك عالاخر من فوق لتحت يا ما تجي بالمرة.

٧. السياسة

رح تقرف كل شي إسمو سياسة. وين ما كان في أعلام للأحزاب، صور عالسيارات، وأغاني للأحزاب السياسية لبيعتبروها اللبنانية كتير شي عادي، بس الأجانب بخافو منا. بالنسبة إلنا، هي إشارة لنعرف إنو صرنا بمنطقة تانية. وكمان رح يسألوك شو عيلتك ومن أي منطقة ليحزرو شو سياستك.

٨. منحتفل بجنون

لو كان نهار أربعاء أو أحد أو…كل يوم في مشروع سهرة أو ضهرة ببيروت. بس بالنسبة للأجانب، ما بيقدرو يصدقو إنو عنا هل قدرة للسهر.

٩. قدي منبالغ باللبس

رايحين عالجامعة، أو عالشغل، أو حتى عالنادي؟ الشباب بيلبسو أحلى تياب والنسوان بحطو مايك أب كامل. وهيدي الشغلة كتير طبيعية بالنسبة إلنا.

١٠. منعيش لندفع للفالي باركينغ

هالشغلة مقبولة إذا رايحين عالنايت، بس إذا رايحين نعمل شوبينغ عند محل زارا أو عالنادي أو عند الماكدونالدز، هالشي ببيّن غريب كتير.

١١. لكل شي في واسطة

بيّك أكيد بيعرف حدا لبيعرف حدا تاني لفيه يضهرك من أي مشكلة بتصير معك بحياتك. وإذا ما زبطت، اعطي مصاري وكل شي بينحل. بتعتبر هيدي رشوة؟ لا! هيدا يوم عادي إذا كنت ساكن ببيروت.

١٢. حافظ عهدوئك واستمر

تهديدات حرب، أو انفجارات، أو انتحاريين؟ عادي، بطّلت تفرق عند اللبنانية. منعيش حياتنا متل المتل البريطاني لبقول “حافظ عهدوئك واستمر”، وبعدنا منشجّع أصحابنا الأجانب يجو يزورونا.