كنتوا عارفين إنو في متحف تحت الماء بلبنان؟

لمحبي الغطس بلبنان صار في عنا متحف تحت الماء بعد تنفيذ مشروع “حدائق تحت الماء” بصيدا بالتعاون مع جمعية أصدقاء زيرة وشاطئ صيدا وبلدية صيدا والجيش اللبناني يلي قدم ٦ دبابات و ٤ ناقلات جند تم وضعها بقاع البحر.

أغرقت الآليات بقرب ساحل صيدا بالجهة الشرقية الشمالية من جزيرة صيدا المعروفة بالزيرة يلي صارت منفس للسكان والغطاسين كونها بتتميز بميتها النضيفة.

وبينقسم المشروع ل ٣ حدائق مختلفين بالمسافة يلي بتفصلهم عن الزيرة والعمق بقلب البحر بدرجة بتتناسب مع القدرات المتفاوتة للغطاسين، أما من الناحية البيئية فكل قطعة نوضعت بالماء تم تنظيفها بيئياً وكل المواد المضرة من زيوت وقطع قابلة للتفكك تمت إزالتها وتنضيفها.

الهدف من هالمشروع هو تنشيط سياحة الغوص ببحر صيدا وجذب عدد كبير من هواة الغطس حول العالم للتمتع بمشاهدة الطبيعة البحرية تحت الماء، بالإضافة لجذب عدد كبير من الأسماك لتصير هالآليات هي موطنها الجديد.