٧ طرق بيتنافسوا اللبنانية بين بعض

نحنا اللبنانية دايماً عم نجرب نزايد على بعض بأي طريقة. مش عم تفهموا عن شو عم بحكي؟ شوفوا هل كم خبرية.

١. التنافس لما تقول لامك انك تعبان

بتفوت حالك بدباجه إلها أول ما إلها آخر! "من شو تعبان إسمالله؟ صرلي ٣ ساعات جايي من الشغل وبعد ما قعدت. وعيت الساعة ٦ لبلش طبخ!"

٢. تنافس السباق يلي بصير على الاشارة الحمرا

لما تكون ناطر على الاشارة الحمرا ويكون في سيارة حدك عم تقرب شوي شوي، بتصير إنت بلا وعي تسابقها لأن ضد عقلك إنو تمشي قبلك! وإذ ببلش التنافس.

٣. التنافس لما تانت عم تحكي عن ابنها

"على فكرة أنا ابني محامي"

"مهضومي المحاماة ما بها شي! أنا ابني مهندس يقبرني"

"إيه أنا ابني خلص طب كمان! صار دكتور الله يحمي"

"أنا المحاماة هواية عند ابني أصلاً! بيتسلى فيها"

٤. التنافس بقوة الواسطة

إذا كان في جائزة لمين بجيب سيرة واسطته اكتر شي، أكيد اللبناني بيربح الذهبي! لما نبلش نذكر كل معارفنا وعلاقتنا بصير الحديث، "إيه ما الوزير فلان ما بيسترجي يعمل شي قبل ما يحكيني" "حاكم مصرف لبنان بيعرف أهلي كتير منيح شو ما بدنا بلبينا بالبنوك" وبالآخر بيطلع مع شي واحد منهن إنو بيقرب الرئيس اوباما.

٥. التنافس لما تلاميذ الطب بيتنفسوا عن مين درس أقل

١: "مش جاهز للفحص أبداً، ما خلصت غير نص المواد"

٢: "منيح إنت مخلص نص أنا ولا حتى شاري الكتاب!"

١: "إيه ما أنا ما خلصتن عل آخر، بس قريتهن علسريع!"

آخر شي التنين بينجحو ب ٩٠٪

٦. التنافس على الفاتورة

ما بتلحق تنزل الفاتورة على الطاولة ببلش التنافس على مين بده يدفع ولأ ما بقبل ولأ أنا أكيد ما بقبل بتبلش المصارعه والصريخ وبالاخر بقول عما بقلبه كيف بخليني إدفع.

٧. التنافس على المصروف

"جبنا طقم دهب جديد من زغيب"

"ييي مهضوم نحنا ستأجرنا شاليت بفاريا"

"اه حلو نحنا ما عندنا وقت لأن مسافرين"