٧ اشارت بتدل إنك مش الطفل المفضل بالبيت

على قد ما يجربوا ينكروا الموضوع، كل إم لبنانية عندها طفل مفضل، وهيدي ٧ دلائل إنو هيدا الطفل مش إنت.

١. ما بتلح عليك تزيد أكل لما تقول إنو شبعت

مع إنو بعدك جوعان بس كان بدك اياها تصر عليك مش أكتر.

٢. رح تفيقك دايماً قبل الدوام وقبل الكل

بتفيقك الساعة ٥ الصبح لتخبرك إنو رح تصير الساعة ٧ وبس تسألها ليه ما فقيت اخواتك بتقلك "ما إلي قلب".

٣. ما عندا مانع إنو ما تتزوج ولا تجيب أولاد

ولا هما تشوف ولاد ولادك قبل ما تموت.

٤. كل مرة بتطلع الفشة براسك

بتصرخ وبتعيط "ما حدا بساعدني بهل بيت" وإنت بعدك جالي الجليات وإذا شافت المفضل عم يقوم يشيل بس صحن بتركض "خلي عنك حبيبي".

٥. ما بتطلب منك تاخد معك جاكيت انت وضاهر

بدك تعتمد على app الطقس إلي ولا مرة زبطت

٦. ما بتجن إذا ما رديت عليا من أول تلفون

ما بتخاف ولا بتبلغ عن طفل مفقود إذا دقتلك وما رديت من أول تلفون، بس ترد بتكون رديت.

٧. ولا مرة بتتذكر إنو هاي الأكلة ما بتحبها

صرلك ٢٤ سنة ما بتاكل كوسا، وكل ما تعملها رح تتفاجأ إنو هي ما معها خبر.