من أقصى الشمال لأقصى الجنوب: ١٠ مناطق لازم تزورها بلبنان

بعيداً عن كل الضجيج اليومي وعجقة السير والتفاصيل الصغيرة اليومية لازم نذكر الجوانب الحلوة الموجودة بهالبلد الصغير لبنان بلدنا يلي فينا نبرموا من شماله لجنوبه بأسبوع، هالبلد يلي فينا نقضي فيه يوم بالبحر ويوم عالتلج، طبيعة هالبلد الرائعة بتنسينا كل التفاصيل المزعجة وبتخلينا متمسكين فيه وبجباله وبسهوله وبمدينته، اخترنالكم أجمل المناطق اللبنانية من أقصى الشمال لأقصى الجنوب يلي فينا نقضي فيها أجمل الأوقات.

١. حرار عكار:

حرار هي لوحة فنية طبيعية بطير العقل من جمالها، بكفي تطلعوا تقضوا نهار بهالمنطقة الرائعة السياحية وتتعرفوا على مطاعمها المطلة على أجمل وديان لبنان.

٢. جزر النخيل:

شو رأيكن بتمضية نهار بجزيرة النخيل بطرابلس وتسبحوا بأنضف بحر، أكيد فكرة حلوة ولتوصلوا عالجزيرة لازم تتطلعوا بشختورة صغيرة من المينا لتوصلكن وترجعكن.

٣. اهدن:

اهدن عروس المصايف بالشمال من أجمل المناطق اللبنانية يلي فيكن تقضوا فيها نهار ما بينتسى، اهدن بتضم العديد من الأماكن السياحية والمقاهي وفيها محمية حرج اهدن بالإضافة لوجود الأوتيلات بالمنطقة.

٤. انفه:

انفه يعني تحت الريح والمطاعم والمسابح الرائعة الموجودة بهالمنطقة يلي بتتميز بجمالها الطبيعي ونضافة نقاوة بحرها.

٥. جبيل:

مدينة جبيل هي مدينة السحر والجمال والآثار ومدينة الفنيقيين والأبجدية، جبيل من أقدم المدن بالعالم، فيكن تزوروا قلعتها وسوقها الأثري القديم والمطاعم الموجودة بالسوق وعالبحر.

٦. شوان:

جنة الشوان هيك وصفوها من شدة جمالها وروعة مناظرها الطبيعية، بحيرة الشوان هي من أروع الأماكن السياحية يلي فيكن تمشوا وتسبحوا وتخيموا فيها.

٧. حمانا:

حمانا هي منطقة سياحية معروفة ببيوتها القديمة وسوقها القديم وطبيعتها الساحرة وبحرشها المليان بشجر الأرز وأكيد ما لازم تروحوا عليكن غدا على ضفاف نهر الشاغور بحمانا.

٨. الباروك:

المشوار بمحمية أرز الباروك بطول العمر مع الإكتشافات الرائعة وإطلالة سهل البقاع من راس الجبل، وأكيد ما بيحلى المشوار إلا مع غدا علي ضفاف نهر الباروك وإذا حابين تقضو ليلة بالباروك فيه غاست هاوس بيستقبلوكن.

٩. عنجر:

منطقة عنجر الموجودة بالبقاع بتتميز بقلعتها الأثرية القديمة يلي بتعود للعصر الأموي وأكيد ما بتحلى زيارة عنجر غير مع زيارة مطاعمها المقصودة من كل المناطق اللبنانية والمشهورة بتقديم سمك الترويت.

١٠. الناقورة:

بأقصى الجنوب على الحدود الفلسطينية في منطقة لبنانية رائعة اسمها الناقورة هالمنطقة مشهرورة بنضافة بحرها وطبيعتها الخلابة وصخورها المميزة ومغاورها المنحوتة بالصخور.