شركاء بالبيت وزملاء بالمهنة

بالأشهر الأخيرة عم نشهد وضع دقيق واستثنائي بلبنان مع انقسام واضح بالشارع اللبناني بين مؤيدين ومعارضين للسلطة الحاكمة، وهيدا الانقسام عم ينعكس على العائلات والبيوت اللبنانية اللي كتير ممكن تشهد اختلاف بوجهات النظر داخل البيت الواحد والعكس صحيح، ممكن يكونوا أفراد البيت كلن مجتمعين على خط واحد. رح نذكر كم ثنائي بعيشوا تحت سقف واحد والهن مواقف واضحة من الوضع الحالي.

نانسي السبع وفراس حاطوم

زملاء بالمؤسسة التلفزيونية وشركاء بالمؤسسة الزوجية. بالشغل بيتحاوروا بأمور سياسية واجتماعية، وبالبيت بيتحاوروا بأمور العائلية. بالفترة الماضية عم نشوف اطلالة الثنائي تقريباً بشكل يومي ب برنامج يوميات ثورة على شاشة الجديد.. خلال الحلقات عم نشوف انسجام واضح بين فراس ونانسي بآرائهن ومواقفهن.

رياض قبيسي وجوزفين ديب

حال رياض قبيسي، زميل نانسي وفراس بتلفزيون الجديد، بيختلف عن حالهن. بالرغم انه متزوج من الإعلامية جوزفين ديب اللي بتمارس نفس مهنته الّا انها بتشتغل بتلفزيون تاني ((otv. رياض وجوزفين بيختلفوا بآرائهن السياسية إلاّ انن أكدوا من خلال مشاركتهن ببرنامج لهون وبس انه علاقتهن الزوجية ممتازة وما بتتأثر الوضع السياسي.

الياس بو صعب وجوليا

هو وزير الدفاع وبينتمي للتيار الوطني الحر متزوج من المغنية اللبنانية جوليا اللي عندها تاريخ موسيقي وفني عريق وبالإضافة لأغانيها الثورية اللي دخلت قلوب كل اللبنانيين خلال كل الحروب والثورات. بهالفترة الدقيقة اللي عم بمر فيها لبنان كتير منّا انتبه على عدم ظهور جوليا الإعلامي وعدم التصريح لمواقف بتدعم الثورة، وهيدا الأمر خلى عدد كبير من جمهورها يزعل وطرح علامات استفهام بعد ما كان متوقع منها موقف ثورجي بيعكس أغانيها.

شامل روكز وكلودين عون

النائب شامل روكز اللي كان عنده مواقف حادة واختلاف مع التيار الوطني الحر، متزوج من بنت الرئيس ميشال عون السيدة كلودين عون. بالمرحلة الأخيرة، شفنا بعض التصريحات للسيدة كلودين اللي بتعكس مواقف زوجها وبتتناقض مع سياسة التيار الحالية.