نفسيات الأشخاص بكل ضهرة لبنانية

من المعروف انو اللبنانية بحبّو الضهرة تكون جمعة كبيرة ان كان عائلة أو أصحاب، وكلّ ما كان العدد أكبر كلّ ما حلّوت الضهرة أكثر. ومن تقاليد الضهرة بلبنان انها تكون نهار طويل ليقضّوا وقت أطول مع بعض وبيتضمّن النهار ترويقة وغدا ونشاطات متنوّعة. ومن الطبيعي بكل ضهرة تلاقي شخصيّات مختلفة لأصحابك أو عائلتك وتصير حافظ نفسية كلّ واحد فيهن بالضهرة كيف بتكون.

خليّنا نتعرّف على نفسيّات الأشخاص اللي ممكن تلاقيها بكلّ ضهرة لبنانية:

1. الشخص اللي بكون أكتر واحد محمّس على الضهرة، مختار النشاطات والمطعم وعلى شوي الأكل اللي حينطلب، ومجهّز أغاني حلوة للسيارة. ومن شدّة حماسه وفرحته كلّ فشخة بيسأل مبسوطين؟ حبيتو القعدة؟ طيّب الأكل؟

2. النِّكِد اللي بيعترض على كلّ شي ولازم يعمل فقسة آخر النهار: ما بدي روح على هيدي المنطقة في أماكن أحلى، لو رحنا على هيداك المطعم كان أطيب، شامّين ريحة زنخة؟ شوفوا العجقة، كتير شوب اليوم..

3. اللي بتحسّ حالك ما بتعرفو ولا بيعرفك طول الضهرة قاعد لحالو ما بيشارك بالحكي ولا بيطلّع بحدا. حتّى اذا الكلّ فرطوا من الضحك يمكن يطلّع ويمكن لا! طول الوقت قاعد والتليفون بايدو والأركيلة بالايد الثانية، بيحكي بس لمّا يقرّر شو بدو يطلب أكل.

4. أبشع نفسيّة اللي بحسسك انك آخدو معك بالقوّة، بيبقى ضاهر بالغصب وقاعد عم يجقُر بالكلّ مش عارف كيف يفلّ على بيته.

5. وأكيد بكلّ ضهرة منلاقي الشخص اللي ما الو خلق يتحرّك، إتّكالي وبدو كلّ شي يجي لعندو، واذا في نشاطات دغري بيرفض يشارك.

6. الشخص المهضوم صاحب الروح المرحة اللي ما بتكمل الضهرة من دونه. طول الوقت عم ينكّت وعم يرسم الضحكة على وجوه اللي ضاهرين معه.

7. أصعب شي اللي بتاخد ولادها معهاعلى الضهرة، هيّ بتقعد مبسوطة وبتترك ولادها خاربين الدنيا وبتطلب من اللي معها ينتبهو عليهن.

8. الشخص اللي بكون حبيب قلبه يعارِض، الكلّ بكونو متفقين على المطعم مثلا بس هو لازم يجي ويعترض.

9. وأخيرا، لمّا بتكون الضهرة مجموعة كبيرة والكلّ متّفق يتقاسموا المبلغ. بيجي الشخص اللي بيتهرّب من الدفع: يا بيختفي فجأة، يا بيتحجّج بالروحة على الحمام، أو حتى ممكن جدّه فجأة يتوفّى!

مين أكثر شخص منهن بتصادفوه بضهراتكن؟