شو رأيكن بنهار كامل بعنجر؟

“عنجر” هي مدينة الآثار والتاريخ والجبل والسهل ومدينة المعارك والإنتصارات والصمود… شو في أحلى من انو كل هالصفات تكون موجودة بمدينة وحدة هي عنجر.

بهالمدينة القديمة الموجودة بسهل البقاع بتتنشق ريحة التاريخ المحفور والمنقوش على جدران قلعتها وآثارها وما فيكن ما تتذكروا بطولات الأجداد فيها.

تعتبر عنجر مدينة سياحية بإمتياز لهيك اخترنالكن بعض الإشيا يلي فيكن تعملوها حتى تقضوا فيها يوم كامل و تكتشفوا الأماكن الموجودة بهالمدينة التاريخية الرائعة.

الترويقة:

لتبلشوا يوم مميز لازم تكون ترويقتكن مميزة بفرن كوكو يلي رح يطعميكن أطيب مناقيش مشروحة من الجبنة والزيتون للزعتر والحرة وكتير أنواع ولا أطيب.

قلعة عنجر:

كل حجر وعامود بالقلعة بيحكي ألف قصة وحكاية، وقلعة عنجر هي من أهم المعالم الأثرية الموجودة بلبنان بعود تاريخها للعصر الأموي، كانت مدينة تجارية كبيرة فيها أسواق شعبية وأحياء سكنية وأسوار وحمامات بخارية بالإضافة للقصر الكبير والصغير والمسجد.

كزدورة بعنجر:

دايماً تذكروا لحتى تكتشفوا منطقة لازم تمشوا فيها وتستمتعوا بكل تفاصيلا وكيف إذا كانت الكزدورة بالحارات الأرمنية يلي تسمت على أسماء القرى يلي نزحوا منها الأرمن بالحرب، وأكيد ما في أجمل من الكزدورة على ضفاف النهر واكتشاف مطاحن الماي القديمة ومزارع سمك الترويت البلدي الطازة.

الغداء:

المعروف بعنجر انو غالبية سكانها من الأرمن ومطاعمها بتقدم أشهى المأكولات يلي بتجمع بين الأكل اللبناني والأرمني لهيك اخترنالكن مطعم مشهور بعنجر.

مطعم الشمس:

لما نحكي عن مطعم الشمس بدنا نحكي عن الكرم والأكل الرائع البشهي وعن حسن الضيافة، هالمطعم مشهور مش بس بعنجر والبقاع بلبنان كلوا.