من بعد ٨٤ سنة، مطعم الصخرة رح يسكر أبوابه

كل ما تتدهور الحالة الإقتصادية بالبلد، عم تاخد معها مؤسسات وأشغال ما قادرة تتحمل الانهيار المالي يلي عايشين في.

من آخر ضحايا الوضع المتردي بلبنان هو مطعم الصخرة بشملان.

تأسس مطعم الصخرة سنة ١٩٣٦ واشتهر بموقعه المميز وأكله يلي بشهي.

ومن بعد ما مرق عليه الدهر و صار جزء من تاريخ لبنان، قرر يسكر أبوابه بسبب الوضع الاقتصادي يلي ما عم يرحم حدا.

كان مطعم الصخرة مشهور بديكوره يلي مستوحى من بيوت لبنان القرميد القديمة. وبهيدا البيت، كان يقدم أكل لبناني تطلع العالم لتجربه من آخر الدنيا. وغير هيك، المناظر يلي كان بطل عليها بترد الروح.

شي مؤسف إنو نشوف هيك مطاعم تراثية وتاريخية عم تسكر لأنه ما عارفة لوين واصلة، خاصة إنو هاي المطاعم عاشت الحرب وضلت واقفة على اجريها.

وكمان ما فينا إلا ما نفكر بالموظفين والعائلات يلي خسرت معيشتها بسبب هاي الأوضاع.

على أمل إنو نشوف ايام احلى قريباً.