شو بتقول أكلتك المفضلة عن شخصيتك؟

أكلتك المفضلة بتكشف كتير خبايا عن شخصيتك، يمكن حتى إنت ما بتعرفها عن حالك…

التبولة

التبولة أكلة تقليدية بإمتياز ولي بحبها بكون كلاسيكي بطبعوا بحب الإعتدال بكل شي: الحامض والبرغل والبقدونس كلو على القد وهو حياتو هيك ماشية على القد.

فتوش

الفتوش مليان نكهات وخضرا ودبس الرمان. معروف إنك بتحب المغامرات لي ما إلا معنى، نابض بالحياة وبتحب كل شي بحركلك حواسك الخمسة أو يمكن الستة.

بامية

بامية الأكلة المفضلة عند القلال. لي بحبها بكون بالعادة شخصيتو مميزة، طبعو رايق وبحب البساطة والرواق وبيتفادى المشاكل.

شاورما إكسترا توم

“بتعرف طعمة تمك منيك”، مش هيك بقولولك؟ مغامر، متهور أحياناً، بتتحمس بسرعة وما بتخلي شي يمنعك تعمل كل شي بتحبوا ولا حتى لحسة توم.

شاورما توم خفيف

إنت من نوع لي كتير نيقا بالأكل وبالحياة كمان. بدك وما بدك وبدك كل شي مصمم على ذوقك وما بتقتنع بسرعة. سمعتك مهمة كتير بالنسبة إلك وإذا شي مش على ذوقك ما بتعملوا لو شو ما صار.

مجدرا

الناس بالأول بستصعب الحكي معك لأن بتبين متكبر وإنك ما بتحكي وما بتفتح للناس بالسهولة، لكنّ بس يتعرفوا عليك بيعرفوا وبيفهموا قدي إنت شخصية مميزة واستثنائية.

ملوخية

معروف عنك فيك تلحق على كل شي بنفس الوقت بدون ولا أي غلطة. بتسعى للأحسن عطول لو قد ما بكلفك تعب وسهر. وبالآخر، نجاحك هوي لي بيحكي عنك.

ورق عنب

شخصيتك حامضة متل الورق عنب..عنيد كتير بس ولا أطيب من هيك قلب. صح بتأسى على حالك وعلى غيرك بس وقت الجد بتقتل حالك لتساعد غيرك.

البطاطا المقلية

محبوب الجميع، ما في حدا ما بحبك. طبعك كتير كول، ما عندك مشكلة بشي بالحياة، بضل تنكت وتمزح.

فول وحمص

بتحب الأكل كتير، وحتى الترويقة بتحبها تكون على الأصول. معروف عنك كريم ومعطاء وبتحب كل شي جبلي والعرق مشروبك المفضل.

البرغر اللبناني

معروف عنك شخص بسيط ومتواضع ومنك متطلب كتير. محب وأحلى الأوقات بتقضيها مع عيلتك. وأغلب ضهراتك بتكون على المطاعم مع العيلة أو الرفقة.

اللحمة النية

طبعك حدّ ومنك هين. العالم بتخاف تغلط معك لأن ردة فعلك ما بتشجع. صح قلبك حنون لكنّ أحياناً طبعك مجنون.

فلالفل

بتحب الألوان كتير وحتى بالأكل. طبعك إيجابي ومعظم حكيك فيو تشجيع وأمل.

كوسا

إنت شخص ناجح وخجول بنفس الوقت. العالم بتفكر خجلك ضعف لكنّ بيتفاجؤ بصلابة مواقفك. بتحمل كتير مشاكل وهموم بقلبك عنك وعن غيرك وهل شي بتعبك نفسياً أحياناً.