٢٩ فكرة بتجي على راسك بس تكون عم تنبش على شغل

القعدة بلا شغل منا هينة، خاصةً بلبنان…

1. بتبلش تحس إنو حياتك ما إلا معنى وبتصير تطرح على نفسك أسئلة وجودية: شو قيمة الإنسان بهل بلد؟ شو قيمة العلم إذا ما في تطبيق؟

2. بتقدم على كل شي وشو ما كان حتى لو كان الشغل ما خصو بإختصاصك لا من قريب ولا من بعيد.

3. بتقدم على كل السفارات.

4. بتصير تقضي وقتك على السيوشيل ميديا عم تحكي حكم وتنصح الناس.

5. بتكتشف إنو أبشع شعور بالعالم إنو تنرفض بالشغل.

6. بتكتشف إنو كل شي قالولك يا بالمدرسة كان كذبة: بتخلصوا جامعة وضغري بتبلشو شغل بأحسن محل لأنكن مخرجين من عنا.

7. بتصير تنق وين ما تروح على الوضع.

8. بتصير تغص لما الجيران يسألو إمك: شو رجعت عملت بنتك/ إبنك بالحياة؟

9. بتحس عبالك تكون بعلاقة جدية بس ما فيك.

10. رح تحس بكآبة وبتزيد كتير بس تكون لحالك.

11. بصير LinkedIn تطبيقك المفضل.

12. بتصير تفش خلقك بالناس لي حواليك.

13. بتغير الCV فوق ال5 مرات بالنهار.

14. بتزيد الكآبة بس تشوف كل رفقاتك ما عم يلاقوا شغل: معقول ما في مخرج…

15. بتصير تتسجل كل يوم بدورة تدريبية.

16. لأول مرة بحياتك بتصبر تحضر أخبار لتفهم شو صاير.

17. بتصير تاخد نصايح من ستك: ستي لشو الشغل؟

18. بتصير تحس بدك تضهر كل يوم لأن قعدة البيت بلشت توترك.

19. بتصير تعرف شو يعني واسطة على المظبوط: داليدا بنت الجيران لي ما قلها 3 أيام مخرجة توظفت، طلع صاحب الشركة بيعرف بيا، قلها تبلش ضغري شغل وأنا إلي 3 شهور بلا شغل.

20. بتصير متردد من خياراتك: يمكن كان لازم سافر بعد المدرسة أو إتخصص شي ماشي أكتر أو يمكن ما روح على الجامعة من الأصل.

21. بتفكر بالهجرة على الخليج بس ما بتجرب حتى لأن عارف الدولة اللبنانية رح تضل ناهيتلك الأمر.

22. بتحس مش مصدق تلاقي شغل بس لتصرف على حالك وما تاخد مصاري من أهلك.

23. صرت تكره شي إسمو internship لأنك على الخبرة صرت تعرف المقصود فيها بلبنان: ما منعلمو شي ومنشغلو بكل شي ببلاش هوي ومبسوط منوعدو بالوظيفة ومنرجع منفللو لنجيب غيرو.

24. بتصير تحن لإيام الجامعة وقت همك الوحيد كان تنجح الفحوصات وأملك كان كبير بالمستقبل.

25. بتحس إنو عبالك تبلش حياتك من أول جديد ببلد تاني ومع ناس تانيي.

26. بتحس حالك عم تستغرب كل يوم لأن بالinterview بحسسك الHR إنو إنت الشخص المثالي وبعد ساعتين بيوصلك بريد إعتذار.

27. بتقضيها تتخانق مع أهلك وصواتكن بضل طالعة على قصص سخيفة من ورا قعدة البيت.

28. فجأة بتصير تعرف تطبخ وتنضف: بفرح أو ببكي؟

29. شو ما كان السبب، تأكد إنو ما في شي بدوم ولي بيشتغل على حالو بالآخر رح يوصل قد ما تأخر.