وفر بنزيناتك وخلي مصرياتك عبر إعتماد وسايل نقل جديدة

مع استمرار ارتفاع أسعار البنزين بشكل متواصل، صار التنقل بالسيارة من الكماليات. لهل السبب قررنا نشارككم عدد من المبادرات لي قدمت حلول ممكنة ولو وقتية لتحسين الوضع.

1. باص هدير

بيتنقل باص هدير بين بيروت والبترون، وتوسع مؤخرًا ليشمل مناطق جديدة، بالمقدمة بعض الجامعات المتمركزة بالحمرا والأشرفية! هل المبادرة مخصصة لتوفير بديل فعال ومريح للسيارة.

كيف بتحجز؟

حمل ال-app الخاصة بهدير وعبي معلوماتك الشخصية وإسم المكان لي بدك تتوجه علي ليبلغك التطبيق عن أي باص لازم تنطر وبأي مكان وبأي وقت. . باص “هدير” مجهز بكل وسايل الراحة والأمان، نضيف، وبقدم خدمة الإنترنت المجانية لركابو.

2. باص باي باص

تم إطلاق ByBus بجبيل الشهر الماضي وبقوم ب8 رحلات يومية: 6 خطوط من القرى الجبيلية بإتجاه المحطات الرئيسية بجبيل، خط واحد مخصص للتنقل بقلب المدينة، وآخر خط بأمن الرحلات من جبيل لبيروت!

كيف بتحجز؟

الدفع بصير عبر البطاقات المسبقة الدفع. يمكن شراء هل البطاقات من أي محطة حافلات بجبيل قبل بوقت. بتم احتساب سعر التوصيلة بعد احتساب المسافة: الأسعار بتبلش ب7000 ليرة وبتشمل أول 5 كيلومترات، مع إضافة 7000 ليرة لبنانية زيادة لكل كيلومتر إضافي.

3. بلا بنزين

تطبيق جديد بشجع فكرة جديدة بلبنان: مشاركة السيارة والتوصيلة إذا الطريق مشتركة بين الطرفين، الراكب والسايق. للمزيد من المعلومات والتفاصيل، زوروا موقعن على إنستاغرام.

4. لوب سكوتر

وفر وقتك ومصرياتك ورتاح من قرف العجقة واستأجر سكوتر كهربائية ليوم واحد أو أسبوع أو حتى شهر! وأحلى شي بالخبرية إنها كتير سهلة الإستعمال.

كيف بتحجز؟

نزل تطبيق Loop Global المتاح على كل من iOS وAndroid وضيف معلوماتك الخاصة. بعد التسجيل مباشرةً، رح توصلك رسالة توجيه مجانية بتعلمك كيفية قيادة السكوتر. بمجرد الحجز، رح تتلقى رمز PIN لي بيسمحلك تستخدم السكوتر الخاصة فيك! يعني الخبرية كلا على بعضها ما بدا أكتر من خمس دقايق!