٢٧ شغلة كل إم لبنانية بتعملها من دون ما تحس
الإمات اللبنانيي منحبن كتير وكل شي بس إيام بطلعونا من تيابنا.
1. بيطلع على بالها تنضف البيت قبل الضو: يعني الساعة ستة الصبح رح توعا على صوت الhoover.
2. بتحب توعيك بكير بالويك أند بدون سبب: يلا قومو، لشو نايمين؟ كترة النوم بضر.
3. بس تعيطلك فوق التلات مرات وبس ترد تسكت: طب شو كان بدك؟
4. وقت تدقلك أكتر من 20 مرة وما يكون فيك ترد وترجع تتصل وما ترد: الله يستر بس إرجع على البيت شو رح يصير.
5. بس تعيطلك بإسم إخواتك: بليز ما تعيديها.
6. أو بس تنسى إسمك: شو إسمك تعا.
7. بس تحط عدة الخياطة بقلب علبة البسكويت: تجي جوعان بدك تاكل بنص الليل لأن الكل نايم وإمك ما فيا تشوفك تلاقي هل منظر.
8. بتعيط عليك إذا ماشي بالبيت بلا كلسات وأكيد بيسمعوا الجيران: معقول راسك، روح لبوس مش ناقصني تمرض.
9. وإذا ضاهر برات البيت بلا فلانيلا: ممنوع تضهر هيك!
10. بتكب تيابك لي ما بيعجبوها بدون ما تقلك: ماما وين البنطلون الأخضر؟ عطيتو لإبن عمك صار صغير عليك.
11. وأكيد ولا مرة بتعترف إنا غلطت وإنت معك حق بس إذا شي تقلك: لاء إنتو فهمتوني غلط، سكوت/سكتي، روح ضب أوضتك هلق، بعدين منحكي مش فاضية.
12. تقلك في مي سخنة وقت لي المي بتكون مجلدة وستعملتن كلن.
13. بتجبرك تلبس جاكيت حتى بس تكون الدني شوب: ما تنسى الجاكيت.
14. بتجبرك تحضر كل غدوات وعشوات العيلة: وأضرب شي بس تكونوا مجتمعين مع عماتك.
15. مش مصدقة كيف تخطب وتتجوز لتحضر عرسك وتخبر قرايبينك والجيران.
16. بتوديلك فويسات طوال لتقلك شي بينقال ب10 ثواني.
17. بتبعت فويس دقيقة بس لتقلك أوكي.
18. بس يكون بدا تسكتك على واتساب بتبعت “K”.
19. بس تقلها كتبيلي على واتساب ما فيي إسمع وتصير تبعتلك فويسات ورا بعض من دون ما توقف.
20. بس تقلك تنضف أوضتك لأنو جايين ضيوف: على أساس الضيوف رح يقعدوا عندي بالأوضة.
21. كل شي بشع فيك وبإخواتك بيطلع الحق على بيك: لمين طالع منخارك هيك نحنا بالعيلة مناخيرنا حلوين، أكيد طالع لعماتك.
22. بس ما يكون إلها جلادة ترد عليك أكيد رح تقلك سأل بيك وبيرجع هوي بقلك سأل إمك ما خصني.
23. كيف بتعبر عن مشاعرها؟ أكيد بالصريخ والمشاكل بس إنو ورا الصوت العالي في حنان مخبى.
24. بتقضي نص عمرها عم تنزلك صورك على فايسبوك وتعاملك تاغ.
25. قدام الكل هيدا إبني/بتتي يقبرني كتير فخورة في/فيا.
26. بالبيت: شو عاملي لالله يبليني بولاد متلكن، مش طالع من أمركن شي.
27. ورغم كل شي، أكيد ما فينا نغفى عشية من غير ما نسمع صوتها.
