سافر بلبنان: قضوا نهار من العمر بالبترون

عبالك تغير جو وتقضي نهار بكاملو بعيد عن بيروت والعجقة والأخبار البشعة؟ خصص نهار لتطلع على البترون لأن حضرنالك برنامج كتير حلو.

1. أطيب بريوش من عند فرن كوكو

بلش نهارك مظبوط ودوق أطيب بريوش شوكولا صخنة من عند فرن كوكو: رح دوب بتمك!

الرقم: 314 430 03

2. فنجان قهوة من عند درمجي

ما بيحلى الصباح من غير فنجان قهوة من عند درمجي وعندن ترويقة بيتوتية رح تنغرموا فيا.

الرقم: 900 632 03

3. عمول يوغا صباحية عند درمجي

بس تخلص أكل وتعبي بطنك منيح ما في أحلى من الرياضة على الخفيف لتحضر حالك لتقضي أجمل نهار، كرمال هيك لازم تجرب اليوغا جنب البحر وترخي أعصابك وتفتح ذهنك. نهارك رح يكون طويل!

الرقم: 900 632 03

4. زور قلعة سمار جبيل

عيش مغامرة تاريخية بهل قلعة المبنية على إيد الفينيقيي ولي تحولت بفترة من الزمن لملجأ لجدودنا بوج الإضطهاد. المنظر على القمة مخيف والحجارة لحالها بتحكي القصة.

5. استأجر شخطورة من عند جونيورس بوت

استأجر شخطورة لمدة ساعة من الوقت وبروم مع العيلة والأصحاب أو الشريك بحر البترون وعيش جو الموسيقى وخود أجمل الصور.

الرقم: 216 072 70

6. أطيب غدا عند بيسترو

أكيد رح تجوعوا كتير بعد كل شي، كرمال هيك لازم تعبوا بطنكن منيح من هيدا المحل بالبترون لي بقدم أطيب المأكولات اللبنانية والبحرية الغير شكل مع منظر مطل على البحر.

الرقم: 151 222 70

7. مأكولات بحرية فاخرة عند جمال

خيار الغدا التاني رح يكون مطعم جمال. جمال بقدم أطيب المأكولات البحرية والسمك بالبترون ويمكن بلبنان. القعدة عندو على البحر، وأكيد مش عم نمزح رح تلمس الرمل بإجريك وتسمع صوت المي إنت وعم تاكل. ملاحظة: الأسعار غالية لكن أكيد ما رح تندموا.

الرقم: 095 740 06

8. ليموناضة فريش من عند ناجي

بس تخلص غدا ما تجرب تاكل حلو لأن الليموناضة بالبترون مش على طول فيك تحصل عليا وأكيد بس تروح لعند ناجي رح تفهم هل شي.

الرقم: 897 323 03

9. تمشى بالسوق العتيق

خود الليموناضة وتوجه صوب السوق العتيق واستكشف شوارع البترون القديمة وزور السوق الطيب والأسواق الأثرية ورح تلاقي كل شي غريب بس قريب على القلب.

10. زور شارع المغتربين

لازم تعرفوا إنو شارع المغتربين أو ال Diaspora Village من أكتر المحلات الأثرية بالبترون. هل محل بيستقبل وبنظم نشاطات ثقافية وفنية على مدار السنة من أعياد لأفراح ومؤتمرات وصولاً للأعراس. مين بيعرف على وقتقن شو رح يكون في؟

11. جرب التوك التوك على البتروني

لي بيلحق يوصل على البترون بدو يجرب كل شي وكل شي يعني التوك توك كمان. بروم كل شوارع البترون والسوق العتيق مع دليل سياحي يعرفك على أبرز المحلات.

12. “سور البحر” أو “السور الفينيقي”

هل سور فيو سحر بيرجع لآلاف السنين لورا. زور قطعة من التاريخ اللبناني القديم وتأمل شوي. بيمتد هل الجدار التاريخي على طول 225 متر وهو بسماكة متر لمتر ونص، وعلى الرغم من إنو أقسام عديدة منو اختفت للأسف لكن معظمو مازال صامد بوج الزمن.

13. ألعاب مائية وقت المغيب عند روتس

في أحلى من إنك تكون بقلب البحر وقت المغيب وتعيش التجربة بكل أبعادها. جدف بالمي وتفرج على الشمس عم تغيب وحس بالنسيم عم يغمر شعرك وبقلبك عم بدق: تجربة من العمر.

الرقم: 762 338 70

14. استأجر بيسيكليت ودورها

إذا ما بتحب التجديف في حل تاني لإلك: ركاب بيسيكليت من عند روتس كمان. “دورها دور دور” بالبترون وخليا دور بكل شارع وجنب كل بيت.

الرقم: 762 338 70

15. بوظة من عند حلمي

أطيب بوظة لبنانية بالبترون ناطرتك! ضروري تجرب البوظة لي بتجي بالقرن: محشاية طعمات فريش، البسكويت مقرمش ومعمول على الإيد ومغطس بأشهى الطعمات لي رح دوب بتمك وتمنحك شعور رائع.

الرقم: 036 173 70

16. سهرة غير شكل عند كولونيل ريف

ختامها مسك عند كولونيا ريف! رح تنهي نهارك بسهرة غير شكل على البحر مع رقص وموسيقى وأجواء حلوة وأطيب المشروبات وأكيد فيك تاكل إذا بعد في محل ببطنك!

الرقم: 543 743 03

17. قضى ليلة من العمر ببيت البترون

لكل يلي حابين يناموا بالبترون فيكن تجربوا بيت التانت كوليت وجيرانكن رح يكونوا شجر الليمون والزيتون واللوز. بيت تراثي رائع مغمور بالطبيعة والشجر والفواكي وفي بيسين وحديقة.

الرقم: 049 270 03

رح ننهي البرنامج بمعلومة عامة عن المنطقة: كانت البترون بالماضي من أهم المدن الفينيقية بالمنطقة، وتم اشتقاق اسم «البترون» من الكلمة اليونانية Botrys (بوتريس) لي تم إدراجها بعدين باللاتينية تحت لفظة بطرس.

أهم شي تحافظوا على نضافة المنطقة! Enjoy