سافر بلبنان: قضوا نهار مليان جمال وأكل طيب بزحلة

مشوار الضيع بلبنان برد الروح، خاصةً بهاي الأوقات الصعبة لأنو بنسيكن همومكن وما بكلف كتير.

مشوارنا اليوم غير شكل على زحلة بهل الصقعات وحضرنالكن برنامج كتير حلو مليان نشاطات لتقضو نهار من العمر.

1. فرن كليمان

أول وصلتك على زحلة لازم تاكل ترويقة غير شكل على الطريقة الفرنساوية عند كليمان: كروسان قرشتها عظيمة، كوكيز، بريوش وشي كتير طيب منقوشة بباغيت مع لبنة ونعنع.

الرقم: 210 743 70

2. ساحة الميدان

ما في أحلى من إنو يطلع الضو وتكون عم تتمشى بالساحة وتشرب قهوة وتاكل كروسان وتسمع صوت العصافير.

3. فرن إبن البلد، تعلبايا

وفيك كمان تنبسط بترويقة لبنانية كريمة كتير ومنقوشة ولقمة شنكليش بهل فرن: العجينة كتير مرتاحة وبتقرمش بالتم.

الرقم: 486 834 03

4. العمار والهندسة التراثية

لتهضم الأكلات ما في أحلى من إنك تتمشى بقلب الضيعة وتتفرج على بيوت القرميد القديمة وتتنفس هوا نضيف.

5. أسواق زحلة

تمشى بأسواق زحلة وشتري لي بيطلع على بالك. في محلات زهورات وأعشاب ما بتلاقي منا ببيروت.

6. محل جابر جابر

مش معقول تطلع على زحلة وما دوق أطيب منتجات صنع جابر. الورق عنب عند جابر قصة، بيجي محشي لبنة وبقلبو زيت زيتون بدوب بالتم متل العسل، خلطة ما بتلاقوها غير بزحلة وفيكن تاخدو قد ما بدكن على بيروت. وأكيد لازم دوقوا قالب الجبنة كابريتشيو المعتق: شي متل الخيال.

الرقم: 836 544 08

7. تعرف على أهل زحلة

الزحلاويي ولا أهضم من هيك برحبوا فيكن وبيحكوا بطريقة بتفوت على القلب.

8. ميغابلاي، تعنايل

إذا معكن ولاد فيكن تاخدوهن على ميغابلاي وتلعبوا سوا بالطابات أو الترانبولين والسيارات النقالة.

الرقم: 883 663 76

9. مطعم البردوني

إذا بتحب الأكل اللبناني والقعدة جنب النهر وصوت المي، هل محل رح ياخدك بالحلم ويقدملك أشهى الأطباق اللبنانية مع كاس عرق شغل زحلة وصحن نعنع: عم تتخايلوا الطعمة وريحة الطبيعة؟

الرقم: 632 290 70

10. مطعم حنا شويري

فيك كمان تتغدى عند هل مطعم لي بيعمل أكل لبناني بلدي بذكرك بلقمة ستك وجدك. الحمص والبطاطا غير شكل والمشاوي بفوتوا على القلب. وإذا حظك حلو بتلاقي طاولة عم تغني الميجانا على الزحلاوي.

الرقم: 099 805 08

11. بوظة البردوني

بعد الغدا ما في أطيب من التحلاية والبردوني بيعرف طعمة تمك منيح وبيعملك أطيب بوظة فيها طعمات كتير جديدة ما في منا ببيروت: دوق وما رح تكون غير مبسوط.

الرقم: 217 416 03

12. سكة الحديد، سعدنايل

زوروا هل جوهرة المخفية بزحلة وخدوا أجمل الصور.

13. دومين دي توريل

زحلة والنبيد قصة غرام مبلشة من زمان. هل معصرة بتعمل أطيب نبيد بلبنان طعمتو بدوب القلب. ضروري تبرموا وتتعرفوا على صناعة النبيد وتشموا ريحة العنب وتتمتعوا بالألوان الحلوي.

الرقم: 114 540 08

14. عرق بران

أكيد ما فيكن تمرقوا على دومين دي توريل من دون ما تزوروا عرق بران وتتعرفوا على العرق اللبناني الأصيل وتشموا ريحة الأرض.

الرقم: 114 540 08

15. مونة إم جمال، تعلبايا

مونة إم جمال من الأرض لسفرتك. تمون من الضيعة قبل ما ترجع على بيروت. عندن شي كتير طيب ما في منو بغير محل: مربى البتنجان.

الرقم: 447 234 71

16. بيت المزارع، دومين دو تعنايل

هل سوق غني بكل أنواع المونة وبعود ريعو لدعم المزارع اللبناني. كل المنتجات شغل ضيع لبنان وفريش.

الرقم: 862 383 81

17. تمشى بطبيعة تعنايل

اكتشف حياة الطبيعة بتعنايل وتأمل المناظر الحلوي لي بتاخدك على محل تاني وبتروقلك أعصابك.

18. أطيب تحلاية عند شمسين

كل شي عندو طيب ولذيذ وأكتر شي السويس رول على فانيلا: كتير طري وخفيف على المعدة.

الرقم: 985 812 08

19. محل كروكي

بتلاقي عندو كل أنواع الهدايا وعندو تشكيلة خاصة لكريسماس بأسعار حلوة.

الرقم: 036 022 03

20. سيدة زحلة

المنظر من فوق سيدة زحلة إذا بتبرم لبنان كلو ما بتلاقي متلو، منظر ولا أروع بيشرف على زحلة وسهل البقاع كلو.

21. أطيب بيتزا عند جيو

صار وقت العشا ويمكن يجي عبالك بيتزا مخبوزة بأطيب عجينة على الحطب وعلى الطريقة الإيطالية: شغلة كتير مهمة.

الرقم: 884 822 08

22. أطيب صفيحة من عند مزارع لقيس

بتجو لهون وبتوصوا على أطيب عشا: صفيحة مع كاسة عيران وبتفلوا مع ضحكة على وجكن على بيروت.

الرقم: 490 931 08

23. سهرة غير شكل عند كاسل بلاك

قبل ما تفل، ضروري تسهر وتنهي نهارك برقصة. قعدتو ولا ألذ من هيك، الحيطان حجر، الأضوية رومانسية والجو فيو كتير إحساس. فيك تطلب أطيب كاس أو عصير مع جو الموسيقى لي بريح القلب.

الرقم: 210 313 70

24. ليلة دافية بواستوود هاوس

إذا ما عبالكن تسربوا وحابين تنامو بزحلة، هل محل شي حلو كتير، بيت خشب، حطبة ونار، بيسين، ودفا وكتير حب.

الرقم: 112 102 08

وهيك بكون خلص مشوار زحلة. زحلة النفس الروعة، الأجواء الحلوي، الناس الطيبة، الأكل البلدي، النبيد لي بدفي القلب والمونة لي بتحرك المشاعر : يا الله شو حلوي زحلة وشو حلوين أهل زحلة، أكيد بتحرز الزيارة!

شوفوا كمان:

قضى نهار بكاملو بإهدن

قضوا نهار من العمر بالبترون

قضوا نهار بياخد العقل بالشوف