١٨ شغلة بقولها البي اللبناني وشو بكون قصدو عنجد

هلق في كتير قصص بقولها بيك بكون عم بلمح أو بلطش على شي وإنت مش دريان.

1. بس يبلش الحديث ببس كنت بعمرك عراف إنو مش عم بخبرك خبرية، عم بلطشك على شي إنت ما بتعملوا.

2. بس يقول أنا بعمرك كنت إطلع الأول بالصف قصدو إنو كان تلميذ بينجح عادي متلو متل غيرو بس ليشجعك تدرس بقول هيك.

3. بس يقول روحو انبسطوا عملوا شو ما بدكن شو بدكن فيي، قصدو خليكن بالبيت عبالي تبقوا معي مستحي عبر عن مشاعري.

4. بس يقول بابا أنا مش مرتاح هلق منحكي بعدين يعني بابا أنا ما إلي جلادتك.

5. بس يصير الحديث أسئلة استجوابية عن إمك وينها وشو عم تعمل، عراف إنو متخانقين وما بدو يقلك ومستحي يرجع يحكيها.

6. بس يقللك ما عم قلك شو تعمل أنا بس عم بنصحك وإنت حر تعمل لي بدك يا، قصدو إنو لازم تعمل شو عم بقلك أو بزعل.

7. بس تكون إمك عاملي مجدرة ويجي على البيت معو فروج مشوي ويقول لإمك جبتو كرمال الولاد حرام لأن كل مرة بقلولي عبالن، بكون جايبو كرمالو قبل كل شي لأن ما عبالو مجدرة.

8. بس يجيب على البيت شوال ليمون وبطيخ وموز لأنكن طلبتوا قبل بليلة بكون قصدوا يقول أنا بحبكن كتير، إنتو بس قلولي شو بدكن وأنا بعمل بس ما بعرف عبر بالحكي، افهموني.

9. بس يسأل إذا إنت صفيت السيارة يعني شاف الخبطة وناطر.

10. بس تعرض علي موضوع مهم أو فكرة شي ضهرة ويقلك مندرسا أو لوقتها بكون قصدو إنو ما إلو جلادة يحكي بالموضوع وما عبالوا يروح لمحل.

11. بس يكون في عرس ويقلك عقبالك بكون قصدو انشالله ما تصير لأن ما بيتخايل البيت بدونك.

12. بس يقول إنو هوي كتير عبالو تعملو ضهرة بالويك أند، قصدو إنو عبالو تطلعوا على الضيعة ليشوف أصحابو والجيران وياكل كبة نية.

13. بس يقول لما كنت بعمركن كنت إسهر للصبح بيقصد إنو كان يروح على القهوة بساحة الضيعة يشوف الشباب ويرجع على البيت على ال10 وعلى ال10:30 يكون غاطس بالتخت.

14. بس يقول إنتو جيل لي صايرلكن مش صاير لحدا نحنا بس كنا بعمركن كنا نروح من البيت على المدرسة ومن المدرسة على البيت، قصدو إنو تخففوا ضهرات لأن في كتير مصروف.

15. بس يبلش يجغل ويقول بس كنت بعمرك كنت شب غير شكل كل، البنات يلحقوني بس أنا ما أخدت غير إمكن، قصدو يشوف حالو عليها قدامكن وما كان في بنات ولا شي.

16. وبس تبلش الجملة تعوا لخبركن شغلة، بكون يعني زهقان وإمك مش فاضية تسمعلو.

17. بس يقول أنا لي بعملوا ولا بي بيعملوا لولادو، قصدو إنو بدي تحبوني وضلو تقولولي ميرسي.

18. بس تكونوا عم تحكوا ويقول والله ما زعلت قصدوا إنو كتير زعل وانجرح ومش بس هيك حاسس إنو ما حدا بحبو وبقدرو.