12 مسلسل كوميدي لبناني بذكروك بطفولتك بلبنان

كتير من المسلسلات الكوميدية يلي ربي عليها جيلنا ويلي طبعت ذاكرتنا مع مرور السنين ولو قد ما منرجع بالزمن لورا ما فينا ننسيها ومنتمنى لو فينا نرجع نحضرها من أول وجديد ولو ترجع الإيام الحلوي والضحكة من القلب، هل مسلسلا أكيد بذكروكون بإيام كتير حلوي.

1. المعلمة والأستاذ

مسلسل كوميدي ربيوا علي الجيل الجديد والقديم بيحكي عن قصة حب بين معلمة وأستاذ، ابراهيم وهند، بعلموا تلاميذ كبار بالعمر بمدرسة لمحو الأمية وكل يوم بصير أحداث شيقة ورومانسية وبضحك بنفس الوقت.

2. عبدو وعبدو

مسلسل لبناني للمثل جورج خباز وبطولة يورغو شلهوب بيحكي عن مغامرات ولاد خالات عايشين سوا ما بيشبهوا بعض بشي وكل حلقة بتحكي قصة ولا أهضم.

3. فاميليا

مسلسل كوميدي فيو نفحة رومنسية بيحكي عن قصص حب تلاميذ الجامعات والصعوبات لي بتواجها العيل وبسلط الضوء على قصة الحب الشهيرة بين نبيلة شقير ورمزي خياط.

4. مش ظابطة

هل مسلسل بطولة باسم مغنية، نادين الراسي ووسام صباغ بجسد حياة عيلة لبنانية كبيرة مهضومة جايين من الجرد وعم يتعرفوا على مرت إبنن الجديدة لي جايي من برا تعيش بلبنان وعلى طريقة تفكيرها المختلفة وهيك بتظهر الفروقات بالتفكير وبصير في مواقف طريفة يومياً.

5. غنوجة بيا

هل مسلسل الكوميدي رافق طفولتنا وبقي محفور بذاكرتنا. مين ما بيتذكر قصة حب رنا بركات وطارق فياض؟ ونادين وشادي؟ وعدنان لي صار شخصية أسطورية انطبعت براس كل لبناني.

6. بنات عماتي وبنتي وأنا

مسلسل كوميدي بيحكي قصة مرة طلقت جديد وعندا بنت بس بعدها مغرومة بجوزها السابق وهوي كمان وكل المسلسل بدور أحداثو عن محاولات تقرب بيناتن فاشلة وطريفة بنفس الوقت.

7. محلولة

بطولة وسام صباغ وفيفيان أنطونيوس، بيحكي عن قصة رجال ومرتو عم بطلقوا بس بعدن بحبوا بعض وعندن ولد إسمو جاد وكل فترة بصير معن مصايب بضحك وبصيروا الجيران يدخلوا ليساعدوهن.

8. مرتي وأنا

أشهر شخصيات كوميدية لبنانية بالألفية على الإطلاق كارين وفادي، والحلو إنو الأبطال مجوزين بالحقيقة والمسلسل بيحكي عن مغامراتن اليومية.

9. سكرتيرة بابا

مسلسل بطولة ابراهيم مرعشلي وكارلا بطرس وبتخبر أحداثو عن رجال مجوز عم بخون مرتو مع السكريتارة وبسلط الضو على المغامرات العائلية المهضومة والخلافات لي بتحصل يومياً بين الولاد.

10. فادي وراضي

بعد ما حقق النجم فادي اندراوس نجاح كبير بستار أكاديمي، قرر يخوض تجربة التمثيل إلى جانب الممثل القدير جورج خباز. هل مسلسل الكوميدي بيحكي عن المغامرات اليومية لولاد العم: “فادي” وحبيبتو “فيفو” و”راضي” الأعمى لي عطول بخلص فادي من مصيبة والصراع على الورتة.

11. عيلة على فرد ميلة

مسلسل مرتي وأنا بحلة جديدة مع شخصيات جديدة ومغامرات طريفة ومهضومة بأسلوب شيق.

12. ساعة بالإذاعة

هل مسلسل بطولة جورج خباز وفيفيان أنطونيوس ونخبة من ألمع ممثلين الكوميديا بيحكي عن الحياة اليومية ومغامرات موظفين إذاعة على الراديو وكيف بعيشوا وبيغلطوا وما بيتعلموا من غلطن رغم كل شي بجو كوميدي مهضوم بشيل الهم عن القلب.