أشهر المسلسلات المكسيكية يلي كبرنا عليها

تكبر بلبنان يعني تتعرف على حضارات كتيرة ومن بين القصص يلي جيلنا كبر عليها، المسلسلات المكسيكية. تعوا نتذكر أشهر المسلسلات يلي طبعت طفولتنا.

1. الحب الحقيقي

بيحكي قصة بنت انفصلت عن خطيبها بالقوة لتتجوز ومع مرور الزمن بتنغرم بجوزها وجوزها بينغرم فيا. وانعملت نسخة لبنانية عن الفيلم، بطولة باميلا الكيك، نيكولا معوض وجوليان معلوف بدور “ركان”.

2. روساليندا

بيحكي عن قصة روساليندا، بياعة ورد، يلي بتفوت على مصح عقلي بعد ما تعرفت على عازف البيانو فرناندو يلي انغرمت في بجنون وأنجبت منو طفل لكن إمو ما تركت طريقة لتفرقن عن بعض.

3. ماريا مارسيديس

فيلم فيو حبكة ولمحة حب وجمال. بيحكي عن قصة مرى فقيرة بتعتني بإخواتها وبتبيع لوتو بالشارع لطلع مصاري وبالآخر بتتجوز رجال غني بوافق نكاية بعمتو وبس تنتقل لتعيش معو ببيت العيلة الكبيرة بتنغرم بإبن عمو يلي ماتت مرتو نهار عرسها: إي هل قد في تعقيد.

4. فيوريلا

من بعد ما بموت أندريس جوز البطلة كتب بوصيته نص ثروته لمرتو فيوريللا والنص التاني لإبنه أندريس، هيدا القرار ما عجب حدا خاصةً روبيرتا إمو وصهرها دييغو وبس يلتقي أندريس جونيور بفيوريلا بتتولد مشاعر الحقد والكراهية بيناتن ولكنها بتتلاشى وبيوقعوا بحب بعضن، الحب المستحيل وهيك بتبلش الأحداث تتسارع.

5. إسميرالدا

إسميرالدا بنت صغيرة عميا وفقيرة عايشة بكوخ مع مرت بيها وخوسيه أرماندو حكيم شب مثقف من عيلة بيناريال الشهيرة والنبيلة وهو على وشك الزواج. بتمر حياتن بسرعة وبنهار بيتعرفوا على بعض وبينغرم خوسيه أرماندو بإسميرالدا.

6. غوادالوبي

إيزيكيل زامبرانو رجل أعمال قوي من ميامي مرتبط بعلاقة حب مع خادمته وبيتركها حبلي. خوفًا من إنو يجبرها إيزيكيل على الإجهاض، بتهرب وأول ما بتولد بتسمي بنتها غوادالوبي. بتتوفى الإم وبتربي عيلة تانية البنت من دون ما يعرفوا إنو إيزيكيل بيها الحقيقي. بتكبر غوادالوبي وبتصير بنت كتير حلوة وطيبة وعندها طموح وآمال كبيرة إنها تعرف مين عيلتها الحقيقية و تتعرف على رجل أحلامها.