أشهى الأكلات الشعبية يلي مشهورة بجنوب لبنان

كل منطقة من مناطق لبنان بتشتهر بأكلات شعبية ولذيذة أما الجنوب موضوع تاني. كلنا منعرف إنو ما في أطيب من الأكل التراثي والضيافة الجنوبية.

رح نقدم بعض الأكلات والحلويات الشعبية الموجودة بالجنوب:

1. المجدرة الحمرا

المجدرة الحمرا من أكلات جنوب لبنان القديمة ما بيعرفوها البيروتيي وأهل الجبل أو الشمال وهي إختصاص أهل الجنوب. المجدرة الحمرا عبارة عن عدس صغير بيتقلى مع كمية من البصل حتى يتحمر وهل شي بيعطي المجدرة لونها الأحمر وبينضاف لإلها البرغل بدل الرز وبتنترك على نار هادية حتى تستوي. وبيعتبر بعض الجنوبيين إنو المجدرة الحمرا أطيب من الفريك أو القمح الأخضر مع الدجاج وأطيب من كتير أكلات جنوبية.

2. الفراكة الجنوبية

الفراكة عبارة عن لحمة مدقوقة بالجرن يلي بينضفلها البرغل مع الملح والكمونة لتصير فراكة جنوبية مأصلة بتفوح منها رائحة الجنوب الحبيب.

3. كمونة البندورة الجنوبية

عبارة عن تحويجة بهارات لدقة الكبة بتم خلطها كتير منيح: ورق عطر، مردكوش، بهار كبة، ورد مجفف، كمون حب، بهار أسود حب، بهار أحمر حب، وقرفة. بينضاف إلها بندورة مطحونة بالخلاط، زيت زيتون، رشة ملح، النعنع وبقدونس مفروم، وبتنخلط المكونات وبتتقدم مع مخللات وخبز مرقوق.

4. حلو ليالي لبنان

بيتحضر هل طبق عبر خلط 4 كبايات حليب سائل، 3 رباع كوب طحين فرخة، 3 ملاعق سكر كبيرة، وملعقة ماي زهر كبيرة بطنجرة كبيرة على النار ليستوي كل شي منيح. بس يخلصوا بيتقدموا بطبق مدور وبتزينوا بالفستق الحلبي وزهر الورد، وفيكن تزيدوا قطر حسب الرغبة.

5. مناقيش ماوي

بتتحضر بالطريقة اللبنانية التقليدية، بالصيداوي يعني المنقوشة المشروحة، كلمة ماوي بتعني الحجم الكبير.

6. كعك العباس

عبارة عن عجينة من الطحين والسكر واليانسون، العقدة الصفرا، السمسم وجوزة الطيب، بينعمل بأشكال دائرية وبتشتهر قرى وبلدات بنت جبيل والنبطية بصناعتو.

7. مناقيش جريش

معروفة بصيدا، طعمتها قوية وواضحة والعجينة طويلة.

8. حلو القزحة

بتتكون القزحة من حبة البركة، طحين القمح، زيت الزيتون والسكر. بينضاف إلها مكسرات متل الجوز والصنوبر، وبتصير قزحة إكسترا. القزحة محدودة الإنتشار بلبنان، وهي من أصناف الحلويات الخاصة بمدينة صيدا. وبعدن ربات البيوت الصيداويات بحضروا حلو القزحة وبقدموها ضيافة بوقت الصبحيات والعصرونيات.

9. السنيورة

بتعود أصول حلو “السنيورة” لحلو “الغريبة” وسموها هيك نسبة لعبد الباسط السنيورة يلي اشتهر بصنعها. وبتتكون عجينة السنيورة من الطحين والسكر والسمنة وبتتميز بقلة المي لي فيا وكترة السمنة وبدها كتير دعك. وبتاخد شكل مربعات صغيرة أو كبيرة، فيا تكون محشية بالفستق الحلبي. وكانت تنخبز بصيدا القديمة بأفران الحطب وتنعمل بأحجام صغيرة.