تعرفوا على أجمل مطاعم عكار

لبنان معروف بالمطاعم والمأكولات الشهية، ومش بس هيك بكرم وضيافة أهل البيت. لأن عكار المنسية، ما حدا بتذكرها إلا بالهم والغم، حبينا نضوي اليوم على جمال هل مساحة الخضرا بلبنان وعلى أجمل المطاعم بربوعها.

١. مطعم الخال Lebanese Grill، منيارة

مطعم الخال بقدم أشهى المأكولات الشرقية والغربية مع قعدة مهضومة وقهوة طيبة.

الرقم: 880 680 81

٢. مطعم هيكل، القبيات-الشنبوق

عمو هيكل عندو أحلى قعدة بالجرد برفقة الصنوبرات وشجر الشوح. هل محل الساحر عبارة عن كوخ حجر مثالي بهيك طقس مع إطلالة بتحبس الأنفاس ولقمة بتشق النفس. بقدموا نبيد كتير طيب ولحمة روعة.

ملاحظة: هيدا المطعم بيفتح على الطلب.

الرقم: 650 329 03

٣. نهر الشير، بقرزلا

نهر الشير من أجمل المطاعم بلبنان مع قعدة بترد الروح، بقدم هيدا مطعم مأكولات لبنانية بأجواء عائلية، وعندوا مازة ومشاوي وأطيب لقمة عصوت المي.

ملاحظة: هل مطعم رح يفتح من العيد وطلوع.

الرقم: 851 821 70

٤. مطعم نبع الشوح، عكار العتيقة

مشتهيين قعدة بقلب الوادي ولقمة طيبة؟ هيدا المطعم رح يعيشكن أجواء جبلية، ببساطة القعدة بطير العقل مع إطلالة على الوادي ومأكولات شهية.

ملاحظة: هل مطعم رح يفتح من العيد وطلوع.

الرقم: 892 557 03

٥. مطعم بيتر وباتريك، حلبا

الكافيهات المحلية دايماً عندا الأجواء الأكتر سحر! بقدم هيدا المقهى المهضوم بيتزا وبرغر وسندويشات، سمك ولقمة لبنانية. نحنا وقت منروح دايماً منطلب باستا بيني أرابياتا وألفريدو ألفريدو أو سيفود بيتزا (بيتزا على ثمار البحر).

الرقم: 815 691 06

٦. مطعم الصياد، بينو

بينو ضيعة ساحرة الجمال من أهم المعالم الأثرية والسياحية بالشمال وبتتمتع وبأجمل المناظر.

هالمطعم بيتميز بتصميم فاخر وقعدة روعة، وبقدم أكل شرقي فاخر من مازات لبنانية لمشاوي على أنواعها وما بدنا ننسى التحلاية بعد الأكل.

ملاحظة: هيدا المطعم بيفتح على الطلب.

الرقم: 828 146 70

٧. غلامور غاردن Glamour Garden، إيلات

واحد من أشهر المطاعم بعكار، بيتميز بتصميمو الساحر وقعدتو الفريدة على الغازون، وبقدم العديد من الأطباق الشرقية والأوروبية الشهية وأكيد الحلويات والمشروبات على أنواعا.

الرقم: 409 341 03

٨. ليتوال دو رحبة L’étoile de Rahbeh، رحبة

هل محل بيتميز بقعدة على البسين مع شجر الصنوبر داير من دار. من أطيب محلات مازة وأكل لبناني بعكار. لقمة طيبة ومن القلب. دوقوا الحمص متبل والكفتا والسمكة الحرة تبعن!

الرقم: 677 191 03

٩. مطعم مطل الوديان، حرار

جو مريح و رومانسي ، والتصميم حديث و تقليدى مع إطلالة بتحبس الأنفاس، والأكل ممتاز ومتنوع! أكل لبناني وجبلي على طاولة واحدة ، بجو راقي. في كمان محل ليلعبوا الولاد.

الرقم: 487 713 03