صبحية وترويقة غير شكل تحت سما لبنان عند هل-١٠ محلات

ما في أطيب من الترويقة وفنجان القهوة والعصير الطازة وصحن الحلو ومحبوبة الجماهير، المنقوشة عند هل الصبح مع شخصكن المفضل وقعدة بترد الروح. لأن حلو الواحد يغنج حالو من وقت لوقت، قررنا نعرفكن على ١٠ مطعم بقدموا أطيب ترويقة لتقضوا أجمل صبحية مع لي بتحبوهون.

١. خان جبيل، جبيل

خان جبيل مطعم لبناني بتلاقوا عند مدخل سواق جبيل العتيق. الجو عندو بيشبه بيت الضيعة وبيتخصص بالترويقة البلدية وكل شي لبناني، المطبخ اللبناني الكلاسيكي مع لمسة جبلية.

الرقم: 599 544 09

٢. فرن مرشاق، سوق البترون

فرن مهضوم بالبترون بيعملوا أطيب مناقيش وصاروخ منقوشة . القعدة مهضومة ومكنكنة من أجمل ما يكون. بس أشهر شي عند مرشاق هو فطاير السبانخ يلي بتاكلوا أصابيعكن وراها. وإذا عبالكن قعدة بالسوق روحوا عند مرشاق يلي بقدم أكل طيب وقعدة حلوة.

الرقم: 050 740 06

٣. فرن دلال، شبطين-البترون

فرن دلال فرن صغير بضيعة شبطين بالبترون بيعملوا أطيب مناقيش ومورقة. هل فرن مشهور بمناقيش البقلة الطازة والسبانغ ومنقوشة الكشك البلدي الغير شكل. القعدة مهضومة بالفرن وبهل طقس الحلو فيكن تستمتعوا بالقعدة برا والمرجوحة. بس تخلصوا أكل فيكن تروحوا تتمشوا بضيعة شبطين، تكتشفوا المنطقة الحلوة وتشموا هوا نضيف.

الرقم: 778 882 78

٤. كعكة سكوير، مار مخايل

كعكة سكوير، محل متخصص بالترويقة البلدية وكل شي في كعك. شي مرة مجربين كعكة مربعة؟ هل كعكة بتلاقوها عند هل محل، عندن نكهات تقليدية ونكهات جديدة غير شكل وقعدة مع فنجان قهوة وكعكة على الصبح.

الرقم: 095 568 01

٥. جلسة العرزال، حراجل

مطعم جبلي مكنكن بفاريا بيشبه بيت جدودنا واللقمة مميزة والجو بسيط. إنتو أكيد بتستاهلوا هَوايات حراجل الحلوين. وبما إنو وصل الربيع صار وقت تلذذوا بترويقة شهية بين الخضار ومقاعد الخشب. أطيب صحن جبنة و لبنة وزعتر ومناقيش وبيض وبطاطا المشوية مع فنجان شاي.

الرقم: 650 711 01

٦. روت، حصرون

هالمحل موجود بقلب الضيعة وسطحو من قرميد مع لمسة جبلية وديكور عصري. الترويقة اللبنانية عندن غير شكل، كريمة كتير بين الشجر والزهور وجلسة بطول العمر.

الرقم: 829 000 71

٧َ. الفلمنكي، السوديكو/ الروشة

هالمحل أشهر من أنّ يعرف ببيروت مشهور بلقمته الطيبة وقعدتو الحلوة. القعدة بوج الروشة لوحدها متعة، كيف إذا كانت مع لقمة طيبة وكل شي في أصناف بتخطر عبالكن على الترويقة وأكيد فنجان قهوة بيعجب خاطركن.

الرقم: 011 808 78

٨َ. ذا ساج بارلور، زهرة الإحسان-بيروت

لمحبي الرواق على بكرة الصبح ولكل حدا بحب يجرب أكلات أجنبية جديدة وطعمات غريبة بس طيبة كتير وصحون الحلو وبيجي عبالو قعدة فاخرة مع فنجان كابتشينو وكاسة عصير ليمون وكعكة فرنسية.

الرقم: 601 217 01

٩. صواني فلفول، بدارو

هل محل دافي مع قعدة تقليدية ونكهات إبداعية، بتلاقوا عندو كل الأصناف لي بيشتهيها قلبكن على الترويقة والفتاة عندن قلها قصة كمان. بتجوا بتاكلوا لقمة طيبة كتير وبتتصوروا.

الرقم: 212 382 01

١٠. مطعم العجمي، الرملة البيضا

مطعم العجمي معلم من معالم بيروت الأثرية بقدم مأكولات لبنانية أصيلة لزوارو وترويقة غير شكل، ويتميز بديكورو الشرقي البسيط ومينو غني للنباتيين ولمحبي اللحمة. هل مطعم مشهور بمنتوجاتو الطازة وقعدتو الحلوة وأكيد صحن الحلويات الشرقية المميز متل النمورة والمعمول بالتمر، المهلبية وغيرها.

الرقم: 260 802 01