٨ بيوت ضيافة بدمشق رح ترجعكن على إيام الزمن الجميل

سوريا معروفة بالبيوت العتيقة والبركة بالنص مع الحجر الأسود والهندسة العتيقة. رح نعرفكن اليوم على جمال بيوت الضيافة والفنادق بدمشق إذا شي نهار حبيتوا تغيروا جو وتسافروا على الخفيف.

١. بيت الوالي، باب توما-دمشق

بيت عتيق فخم رح بذكركن ببيوت باب الحارة مع لمسة سحرية دمشقية. هل بيت مجهز بكل شي لتعيشوا راحة نفسية وجو ريفي دمشقي فاخر.

الرقم: 6666 543 11 963

٢. أوتيل المملوكة، باب توما-دمشق

أوتيل بيشبه حكايات الخيال، شوفوا الهندسة التراثية والأوض الواسعة لي عمرها فوق ال300 سنة. هل بيت بطل على شارع قديم حيطانو دافية تحت فيّات شجر الحامض والليمون. بيتألف من 8 أوض نوم رح ينقلوا التاريخ ويخبروكن عن الحياة الدمشقية القديمة.

الرقم: 0445 543 11 963

٣. بيت آق بيك، دمشق القديمة

بيت قديم مصنوع على الطراز التقليدي الدمشقي، تم تحويلو لأوتيل 4 نجوم. من أجمل البيوت القديمة، بيتقدم الأكل على صينية متل إيام زمان وبيتاكل حد بركة المي.

الرقم: 0044 542 11 963

٤. بيت زعفران، دمشق القديمة-باب توما

بيت دمشقي قديم بيحمل رونق إيام الزمن الجميل وبخبي بحيطانو حكايات ما بتخلص. عيشوا أجواء تراثية مع نومة هنية وفنجان شاي على الصبح، شجر الليمون داير من دار ومطعم تراثي.

الرقم: 469 684 995 963

٥. أوتيل الزيتونة، باب توما-دمشق

الزيتونة من أجمل البيوت لي مممكن تشوفوها بدمشق القديمة، كل شي في ساحر وخيالي. مغمور بالورد، الحب والتفاصيل الزغيرة. ما في أطيب من فنجان الشاي حد نافورة المي.

الرقم: 561 999 933 963

٦. بيت زمان، باب توما-دمشق

بيت دمشقي تقليدي مع لمسة عصرية وحمام بخار مطرح ما فيكن تسترخوا وتتمتعوا بالتدليك وفرك الجلد وعلاج الجسم. هل بيت احتضن شخصيات تاريخية عريقة إيام الحكم الأموي، بيتألف من 28 أوضة وقريب على السوق القديم.

الرقم: 5380 543 11 963

٧. أوتيل تاليسمان، شارع الأمين-دمشق

بيت تراثي عتيق بضم غرف واسعة ولوحات فنية، تريات وديكور تراثي مع لمسة عصرية وأجواء رومانسية. زوروا هل بيت وعملوا رحلة ثقافية بالزمن وشموا عطر دمشق والحياة القديمة وبساطة وطيبة الناس.

الرقم: 900 900 988 963

٨. أوتيل شهريار، دمشق

هل بيت رح يذكركن بحكايات ألف ليلة وليلة، هوي محل دافي بضم 8 أوض نوم مليانة تراث وأثاث جميل بعود تاريخن للقرن التامن عشر وفي كمان موزاييك ونافورة مي عمرها فوق ال150 سنة لتعيشوا أجواء استثنائية.

الرقم: 519 220 933 963