تعوا نتذكر برامج تلفزيون المستقبل لي ربينا عليا

كلنا ربينا على تلفزون المستقبل وعلى البرامج لي كانت بمثابة المسلي الأول بالبيت خاصةً وقت تسكير محطة الMTV والظروف الصعبة لي قطع فيا البلد فكنا ننطر البرامج الحلوة للنسا شو صاير بلبنان ونضحك شوي ونشوف أشهر الوجوه الإعلامية اللبنانية. ما فينا ما نذكر البرامج الترفيهية والمضحكة وفي كتير برامج جدية وبرامج ألعاب ومسابقات حبيناها من قلبنا ومنتمنى نرجع نحضرها مرة تانية.

١. الإستحقاق

كان هل برنامج بيحكي عن مواضيع سياسية إسبوعية من إعداد وتقديم الإعلامي الشهير علي حمادة.

٢. الليل المفتوح

كان من أقوى البرامج لي الناس تنطرها مناطرة ببدايات تلفزيون المستقبل، كان عندو شعبية كبيرة ونسبة مشاهدة عالية، صاحب فكرة البرنامج طلال شتوي وإخراج رشيد كنج.

٣. سوبر ستار

كلنا كنا نوقف كل شي عم نعملوا وقت يبلش برنامج سوبر ستار يلي كان محبوب اللبنانيي والعرب. كان الموسم الأول موسمنا المفضل، كان في ديانا كرزون وملحم زين. بتذكروا قدي كنا ننطر الكاستينغ لنتسلى ونشوف الناس لي ما بيعرفوا يغنوا قابضين حالن جد وجايين يغنوا. كان في باللجنة الراحل الكبير الياس الرحباني وزياد بطرس خيها لجوليا، وسوبر ستار هوي النسخة العربية من البرنامج البريطاني بوب أيدول “Pop Idol”.

٤. لا يمل

برنامج كوميدي ساخر كان يصور القضايا الإجتماعية والسياسية بلبنان والعالم بطريقة بتموت ضحك. مين ما بيذكر “مستر لغات”، “ميتر عادل”، وخفة دم رولا وأنجو؟ يا ريت منرجع منشوفن على الشاشة اشتقنالن كتير.

٥. ميشو شو

“مع ميشو مع ميشو مع ميشو شو”، ياي شو كنا نحب هل غنية. هل برنامج كان من أهم برامج الألعاب لي حققت نجاح كبير بوقتها، تقديم المذيع ميشال قزي لي شكل حالة خاصة بعالم برامج الألعاب ولي كانوا كل الناس يقولولوا “ميشو”.

٦. سيرة وانفتحت

مين ما بيذكر زافين؟ كل الناس بتعرف زافين وأسئلة زافين. سيرة وانفتحت يلي بعدها الغنية تبعو علقانة براسنا هوي برنامج حواري مفتوح عن قضايا المجتمع والسياسة قدمو الإعلامي زافين قيومجيان.

٧. خليك بالبيت

برنامج مقابلات قدمو الإعلامي والمذيع زاهي وهبي وشهناز عبدالله وكانو كل مرة يستقبلوا ضيف شكل ويعملوا معو حوار طويل وممتع.

٨. عالم الصباح

برنامج كان يطل على اللبنانيي كل يوم الصبح تقديم جوزيف الحويك ورولا بقسماطي وغيدا مجذوب وغادة أبو عضل حسون. كان في عدة فقرات متل “و رشة ملح” و”الحلو بلبنان” و”بالسينما” و”كارمن شمال والأبراج” مع كارمن شماس يلي أثارت الجدل مؤخراً بسبب حديثها عن الحمية النباتية. هل برنامج قطعوا علي إعلاميين كبار كتار متل ريما كركي، كارين سلامة يلي انتقلت لتلفزيون الجديد، يمنى شري، نادية البساط، نادين حيدر، وحتى ميشال قزي.

٩. الحلقة الأضعف

برنامج مسابقات انشهر كتير بجملة “إنت الحلقة الأضعف”، هوي النسخة اللبنانية عن برنامج The Weakest Link وقدمتوا المذيعة ريتا خوري يلي صارت بوقتها حديث الساعة وأثارت جدل الجمهور.

١٠. د ن آ DNA

برنامج سياسي ساخر كانوا يحطوا من التنين للجمعة من إعداد وتقديم الإعلامي نديم قطيش.

١١. الفخ

برنامج مسابقات وهوي النسخة اللبنانية عن برنامج The Trap، انعرض من سنة 2002 لحديت سنة ال2004، قدموا الإعلامي اللبناني ابراهيم أبو جودة.

١٢. إيقاع

مين ما كان يحب وج ميراي مزرعاني البشوش؟ كنا ننطرها مناطرة كل جمعة لنتسلى ونقضي وقت حلو. إيقاع كان برنامج مسابقات موسيقى بين فريقين من المشاهير بيعتمد على معلوماتن الموسيقية ليربحوا اللعبة وكان كل مرة يجي فنان يحيى الحفلة ويطلق أجدد أغاني.

١٣. أبو رياض

بس نذكر هل برنامج كلنا بتجي على راسنا الغنية “أني أني أبو رياض أني إبن بيروت”، مين ما بيذكر شخصية أبو رياض لبتفقع ضحك، لي بيحكي بيروتي وعطول بيعمل ضروبي برفيقو عباس لي قلبو طيب وبتحمل كل شي من أبو رياض.