لقينا ٢٠ مطعم بالبترون مع منظر بطير العقل

بعد ما شفنا ١٦ مطعم بجبيل مع منظر بطير العقل، اليوم رح نخبركن عن أحب مدينة على قلبي وقلب كتار، البترون. هل جوهرة حاملي خوابي الحضارة الفينيقية وممزوجة بالروح الريفية الجبلية ومحمية بالسوق الفينيقي العريق، ومشهورة بأطيب أكلة سمك طازة وأجمل جلسة على البحر. تعوا روحوا معنا اليوم بجولة على أجمل وأعرق المطاعم بربوع البترون لناخدكن كزدورة على كل زاوية من زوايا البترون لتكتشفوا مطعمكن المفضل وتشوفوا وين بتلاقوا حالكن!

يلا نروح على البترون!

١. بحصا، المندلون

بس تمشوا على شط البحصة وتكفوا على طول الطريق رح توصلوا على مطعم ساحر على البحر بيعمل أطيب مأكولات بحرية وأطباق لبنانية مع منظر بياخد العقل على البحر وقعدة مع صوت الموج بيسحروا النظر وبخلوا القلب يدق. بس تخلصوا أكل فيكن تغطسوا إجريكن بالمي وتتأملوا الشمس عم تغيب ورا البحر وتحلموا.

الرقم: 407 070 70

٢. أبيتيتو تراتوريا

مين مولع بالأكل الإيطالي؟ هل محل موجود بأكتر نقطة أثرية بالبترون بحضر أشهى المأكولات التليانية على الأصول. أول ما توصلوا رح تحسوا حالكن بجزيرة أمالفي الإيطالية من ورا الديكور والقعدة الخشب لي بيطغي عليها لون الأحمر والأبيض متل شي فيلم رومانسي.

الرقم: 422 642 06

٣. تييرا

وصلنا على محل كتير مميز مش بس بالقاعدة وبطريقة تحضير المأكولات. تييرا مطعم بيجمع المطبخ الفرنساوي والتلياني مع أجواء بحر أوسطية وحب وفن. كل شي بحضروا على إيديّن والقعدة بسيطة بس بطير العقل بتشبه قعدة جزر إيطاليا الريفية، ضروري تجربوا القهوة عندن يلي رح يخلطوها قدامكن وتشموا الريحة الطيبة.

الرقم: 006 739 70

٤. مرشاق بالسوق

إنتو وعم تتمشوا بالسوق العتيق رح يلفتلكن نظركن هل مطعم، بيطغي علي لون الأزرق ومصابيح بيضا وبيج عاطيي جو شرقي رومانسي مع كراسي خشب وقعدة حجر. هل محل بقدم لقمة طيبة معمولة بفن وجمال وبيعمل حفلات موسيقية كل فترة.

الرقم: 151 666 76

٥. ليمون كافي

كافي بقدم أكلات سريعة بطريقة كتير طيبة مع خلطات لذيذة وشهية وقعدة مهضومة.

الرقم: 441 744 06

٦. رايس

مطعم فيو ريحة البترون، بس توصلوا رح تحسوا حالكن بشي جزيرة باليونان. بقدم رايس أجود أنواع الأطباق اللبنانية، السمك وثمار البحر مع ديكور لبناني بتروني بيطغي علي لون الأزرق والأبيض وقعدة على البحر.

الرقم: 703 919 03

٧. كيل

هل محل بيحمل تراث البترون البحري من خلال القناطر الحجر والديكور والألوان الخافتة، رح تحسوا حالكن بعالم تاني. هل محل مش بقدم أكل، بيعمل كمان سهرات موسيقية ونشاطات وفي طاولة بليارد.

الرقم: 499 888 71

٨. سان ستيفانو ديل مار

مين مغروم بالبحر وريحة البحر؟ مطعم بياخد العقل على مينا البترون بطل على أجمل منظر وقعدة غير شكل وأكلة سمك ومشروب. هل مطعم جار السما وبنام على كتف السنسول ليمنحكن تجربة استثنائية.

الرقم: 323 131 03

٩. بترونيات

هوي من كلاسيكيات المنطقة، مطعم تراثي لبناني مزين بقناطر الحجر بقدم أطيب أكل لبناني تقليدي ومونة بلدية مع جو فينيقي أصيل وقعدة خشب وتراس برا على العشب بياخد العقل.

الرقم: 510 744 06

١٠. لو ماران

متخصص بالمطبخ اللبناني التقليدي، والقعدة عندو على البحر، المطعم واسع وشرح والخدمة ممتازة والقعدة على التراس بتحبس الأنفاس.

الرقم: 016 744 06

١١. بيسترو

مطعم على البحر بقدم كل أنواع ثمار البحر والسمك متل “الكالاماري” و”الباني” وغيرها من الأطباق اللبنانية والعالمية مع قعدة حجر وأناطر وجو ريفي لبناني مع لمسة عصرية.

الرقم: 151 222 70

١٢. مرشاق على البحر

بيعمل أكلات سمك غير شكل مع جلسة على البحر وجو بتروني أصيل، بتوصلوا، بتنزلوا بدرج حجر مغطى بالورود داير من دار لتوصلوا على الطاولات، كل شي فريش وبيجي على صحنكن دغري والجو رومانسي كتير.

الرقم: 888 948 76

١٣. قهوة زيتونة

هوي الفرع التاني لقهوة زيتونة ببيروت، حامل روح بيروت على البترون مع قعدة أثرية بسوق البترون وأكل لبناني بيفتح النفس.

١٤. أوهانيس

إذا بعد مش مجربين المطبخ الأرمني، هل محل مثالي لأطيب صحن كباب ومانتي. بتلاقوا عندو كل أنواع الطبخات الارمنية المعمولين بفن وحب وإتقان، في كل الألوان والأحجام والطعمات محضرة ببهارات وصلصات خاصة بالمطعم. بيتميز كمان بقعدة أثرية وبروح المرحة لفريق العمل وهيك بتقضوا أحلى سهرية.

الرقم: 555 899 76

١٥. قرية قرنعون

إذا عبالكن ترجعوا للجذور وتستكشفوا تفاصيل حياة إيام زمان بالضيع اللبنانية، ما إلكن غير تزوروا هالمحل. قرية قرنعون عبارة عن بيت حجر مع قعدة بترد الروح، ديكور ساحر، أكل طيب ونشاطات مليانة فرح وبسط وتراث.

الرقم: 111 642 06

١٦. بار ديل مار

شو في أجمل من القعدة على البحر وتسمعوا صوت الموج متل الموسيقى بدينيكن وتشموا ريحة المي وتاكلوا أكل طيب مع كاسة شراب مجلدة إنتو وعم تسرحوا بأفكاركن.

الرقم: 086 196 76

١٧. ماريولينو

بتوصلوا على هل محل بتحسوا حالكن بجنة زغيرة بروما، بتبرموا بتلاقوا اللمبات الخافتة معلقين على الشجر وبتفوتوا لجوا بتلاقوا القناطر والزريعة وشباك بيت جدي وألوان على مد عينكن والنظر. رح تنغرموا بالبيتزا يلي بيعملها، شوفوا كل الأحجام والطعمات وجربوا السلطات والمأكولات البحرية الساحرة.

الرقم: 555 766 76

١٨. تيراس عبدلي

شوفينا نخبر عن هل محل؟ بس توصلوا على هل بيت الحجر العتيق رح تتنفسوا ويبلش قلبكن يدق. البرودات بدفوا القلب والورود بخلوكن تسرحوا بأفكاركن والقعدة بهل مطعم متل شي حلم من أحلام الخيال.

الرقم: 569 333 70

١٩. شي رفيق

مطعم مأكولات بحرية على البحر بطل على أجمل منظر وقعدة غير شكل وبيعمل أطيب أكلة سمك ومشروب. هل مطعم جار البحر والسمك بيعمل كل شي ثمار البحر بيخطر على بالكن بطريقة طيبة ليمنحكن تجربة استثنائية: تخايلوا الموج عم بطير حدكن وإنتو عم تاكلوا هل أكل الطيب.

الرقم: 605 642 06

٢٠. درمجي

مطعم متأثر بالستيل الغجري رح يوصلكن بالطبيعة والأرض بحب. متخصص بالأكل الصحي والحياة الصحية وبيعمل رياضة اليوغا لكل حدا عبالو يجرب لأول مرة مع منظر على البحر وموسيقى رايقة.

الرقم: 900 632 03