شو مشاريعنا
ميليسا سليمان

لقينا ١٠ مطاعم بقدموا مازة لبنانية مع منظر بطير العقل

بيطلع على بالنا إيام نهرب من المدينة والعجقة ونعيش أجواء الصيف، أكل وفرح وهيصة وموسيقى، طقس حلو، زهور وبيوت قرميد وشوارع ضيقة وريحة الأرض وخبز الصاج وصور تذكارية حلوة. لهيك قررنا ناخدكن اليوم مشوار على ١٠ من أجمل المطاعم بلبنان بقدموا مازة لبنانية غير شكل بأجواء مميزة وقعدة بترد الروح.

١. قصر فخر الدين، برمانا

قصر فخر الدين من أجمل المطاعم الأثرية بلبنان، بيتمتع بمنظر متل حكايات الخيال، بتوصلوا بتطلعوا على الدرج التراثي تحت القناطر وبتسمعوا أغاني فيروز وبتشموا ريحة الأكل الطيب وبتحنوا لإيام زمان. هل مطعم رح يرجعكن بالذاكرة لزمن الماضي الجميل وإيام فخر الدين وجدودنا، رح تلاقوا قناطر من حجر، ملفوفة بالزهر وجرة مي وعين وقعدة لبنانية تراثية. بقدم هل محل مازة لبنانية على الأصول والكمية كتير كريمة، القعدة مريحة والطعمة بطير العقل.

الرقم: 387 961 04

٢. شوارات، فاريا

فاريا من أجمل المناطق بلبنان الكل بيقصدها ليتفرج على المناظر الحلوة أو ليشوف تمثال مار شربل والمطاعم الحلوة أو ليشوف سد شبروح. مطعم شوارات تاكي على كتف الجبل، مع النسمات الحلوين والورود، بقدم مازة لبنانية على الأصول بتجي على طاولتكن وبتخليكن تشبعوا منيح من الأكل اللبناني التقليدي.

الرقم: 265 271 03

٣. بيتنا، الباروك

هل محل موجود بضيعة الباروك الحلوة، بتلاقوا بقلبوا عين مي مسقعة فيكن تشربوا منا مي لتشبعوا، بتقعدوا على الشير وبتتفرجوا على الوادي وبتوصل المازة على طاولتكن مع أغاني وائل كفوري ووديع الصافي. في أحلى من هيك قعدة؟ لقمة بيتنا مش بس طيبة وكريمة كمان، اللحمة والطاووق والكفتا رح تاكلوا صابيعكن وراهن والأسعار مدروسة.

الرقم: 456 841 03

٤. أدوناي، جبيل

مين مشتهي قعدة لبنانية أصيلة؟ أدوناي بقدم أطيب مازة لبنانية بالفخارة وأطيب لقمة لبنانية على الحطبة والنار وبجبلكن التاريخ الفينيقي على طبق من فخار. هل محل الموجود بنص السوق العتيق، رح يحسسكن إنكن رحتوا رحلة بالزمن وعم تكتشفوا التراث اللبناني من أول وجديد.

الرقم: 788 236 70

٥. الطواحين، البترون

محل موجود بالبترون ببساتين العصي، مغطس بالمي والمنظر في جنات على مد عينك والنظر. بتوصلوا بتسمعوا صوت المي ونسيم الشجر العليل وعصافير الحب، وبتشموا عطر الأرض والتراب وريحة الأكل الطيبة. الطواحين بيعمل أطيب مازة لبنانية، كل شي فريش وبيجي على صحنكن دغري والجو بياخد العقل: يعني مشاوي، مازة، معجنات، بطاطا حرة وبطاطا مقلية وكل شي طيب مع شوية حنيّة وصور وذكريات.

الرقم: 021 904 0

٦َ. لو كاب، عمشيت

عبالكن تاكلوا أطيب أكلة سمك طازة وتحت إجريكن المي؟ محبين السمك مش رع يزعلوا اليوم لأنّ رح نخبركن عن هل محل الموجود على البحر وبقدم مازة لبنانية من فتوش وبطاطا حرة وحمص وورق عنب ومحل المشاوي مأكولات بحرية من جميعو وكل شي بيخطر على بالكن وهيك بتجربوا أصناف جديدة وبتتفرجوا على البحر وبتعملوا سبحة إذا عبالكن أو بتغطسوا إجريكن بالمي بعد ما تعبوا بطنكن منيح.

الرقم: 136 961 03

٧. أمواج البياضة، الناقورة

هل مطعم إسم على مسما، عايش بالبحر ومغمور بأمواج أنضف وأجمل بحر بلبنان. بهل محل فيكن تعيشوا لحظات رومانسية وتاخدوا أجمل الصور وتاكلوا أطيب مازة لبنانية. بتوصلوا بيستقبلكن صوت الموج وبتعيشوا تجربة استثنائية، بتسمعوا صوت المي مع كل قرشة إنتو وعم تاكلوا. مش بس هيك فيكن تأرغلوا وتشوفوا منظر غياب الشمس وتشربوا شي ببورد وترجعوا تتحلوا.

الرقم: 220 522 71

٨. مطعم الشير، بقرزلا

بقرزلا من أجمل ضيع عكار، بيقصدها أهلها والسواح أكتر شي بفصل الربيع والصيف لأن بكون الشلال كتير منعش والمي جارية. محل موجود على الشلال بقدم أطيب مازة لبنانية مع قعدة بتخلي القلب يدق. الشير بيعمل تشكيلة واسعة من أطيب أنواع الأكلات اللبنانية متل التبولة والفتوش، الرقاقات، الحمص والبتنجان، الكبة والمشاوي وأطيب تحلاية مع صحن فواكي طازة وشفة قهوة بتنسيكن هموم الدني.

الرقم: 851 821 70

٩. الشالوف، جزين

جزين معروفة بالشلالات والمناظر الطبيعية الرائعة وبيوتها التراثية وطبيعتها وغابة الصنوبر العظيمة وهيي من أقدم ضيع لبنان. بس يصير وقت الغدا، الكل رح يدلكن على مطعم الشالوف يلي بيستاهل دوقولوا أكلاتو الطيبين كتير. بس توصلوا رح تلاقوا مازة لبنانية على أنواعها ناطرتكن مع منظر بعقد: ما في أجمل من القعدة بالشالوف مع منظر الطبيعة الحلوة، لقمة الكبة النية وأغاني فيروز.

الرقم: 774 781 07

١٠. جنة بعقلين، بعقلين

هل مطعم مغمور بالشلالات والأكل الطيب وصوت المي. بس توصلوا على طاولتكن، هونيك ناطركن قعدة بتشبه الجنة على الأرض، رح تحسوا حالكن قاعدين بالشلال وقبالكن أطيب مازة لبنانية. بتاكلوا لتشبعوا وبترجعوا تتفرجوا على المي الجارية إنتو وعم تشربوا قهوة بعد الغدا، عنجد علاج نفسي.

الرقم: 669 924 03