٩ أماكن تروحوا عليها مع ولادكن بالعيد غير مدينة الملاهي

عيد الأضحى وصل وبنعرف انه الكل بيكونوا محتارين وين بدن يضهروا وياخدوا ولادن. لهيك نحنا حبينا نقيلكن كم محل مناسب للكبار وللصغار بتروحوا عليه مع الولاد وبتنبسطوا انتو وياهن.

١- بارك Mambobeach بزحلة

كلنا بنعرف انه بالعيد بنحب نلبس تياب جديدة ونضهر عأماكن بعيدة شوي عن جو البحر والسباحة بس فينا كمان نخرج شوي عن المألوف ونروح نقضي وقت كتير حلو بالMambobeach بزحلة ويلي هو بارك مائي للولاد والحلو انه في بركة للكبار فيها بيفوتوا مع ولادن بيسبحوا وبينبسطوا بالاضافة لوجود مطعم بقدم أكل كتير طيب.

٢– مخيم Swings camp بزرعون، المتن

كمان بهيدا المحل لح تخرجوا شوي عن المألوف محل مليان بالنشاط والحيوية بمنطقة كتير حلوة. عدا عن المطعم الموجود فيه، هالمحل بيقدملكن عدد من النشاطات والرياضات الجبلية للكبار والصغار كما انه فيكن تعملوا فيه camping وpicnic وتجيبوا معكن أكلاتكن.

٣- نادي AleyEqui Club بعاليه

كمان بهيدا المحل الموجود بعاليه بتتسلوا بشكل مش طبيعي، بيقدم عدد من الرياضات الجبلية للكبار والصغار كما انه فيكن تركبوا على الخيل وتجربوا وحدة من أعلى المراجيح الموجودة بلبنان وبتاكلوا لقمة طيبة كمان.

٤- قرية Arnaoon Village بالبترون

هالمحل بيجمع كل شي بمنطقة من أجمل مناطق لبنان، وهوي من أجمل الوجهات السياحية. وب Arnaoon Village بتعيشوا مغامرات عديدة للكبار والصغار من سباحة لنشاطات رياضية للعب ورقص وأكل ولا أطيب. لازم تجربوا بتكون رحلة كتير حلة للعيد!

٥- بارك Dino City بعجلتون

هالبارك الموجود بعجلتون منه بارك عادي، بالعكس هو بيجمع بين التسلية والثقافة للكبار والصغار. اذا حابين تتعرفوا على الداينصورات وتكتشفوا كيف كانوا يعيشوا الهنود الحمر وغيرها من النشاطات ما الكن الا هيدا المحل.

٦- محمية تعنايل بمنطقة تعنايل بالبقاع

محمية تعنايل كمان هي محل كتير حلو للكبار والصغار، هي عبارة عن حديقة حيوانات كتير كبيرة وفيها ممرات للمشي بنص الطبيعة بين الشجرات. كمان فيكن تستأجروا بيسيكلات وتعملوا جولة بنص الطبيعة، عدا عن الأكل الطيب والستاندات يلي بحتووا على كل شي خصه بالمونة البيتية وشغل ايد. وكمان في نشاطات رياضية متل الzipline وغيرها.

٧- حديقة X-plore adventure park بالناقورة

حديقة كبيرة للحيوانات، بتتعرفوا فيها على أنواع حيوانات غريبة اول مرة ممكن تشوفوها. وكمان فيها نشاطات رياضية للكبار والصغار متل الzipline وغيرها. محل كتير مناسب لضهرة العيد لالكن ولولادكن.

٨- بحيرة بنشعي بزغرتا

بحيرة بنشعي من أهم المعالم السياحية بمنطقة زغرتا فيكن تروحوا تقضوا النهار فيها انتو وولادكن. بتعملوا بيدالو او رحلة بالشختورة بقلب البحيرة وفيكن تزوروا متحف الشمع والحيوانات المحنطة، وكمان فيكن تنقوا واحد من المطاعم الموجودة حواليها وتاكلوا فيه.

٩. تلفريك بجونيه

كمان فيكن تاخدوا الولاد وتروحوا عجونيه تعملوا جولة بالتلفريك وتروحوا فيه على حريصا تزوروا سيدة حريصا وتقضوا النهار بوحدة من اجمل المناطق اللبنانية. وكمان في train فيكن تعملوا جولة فيه وتنقوا مطعم من المطاعم الموجودة وتاكلوا اطيب أكل. في أحلى من انه تكونوا بالسما وبيروت كلها تحتكن.