مزيارة: ضيعة الغرايب والعجايب لي لازم تزوروها بلبنان

تعتبر ضيعة مزيارة بقضاء زغرتا-الشمال من أجمل الضيع بلبنان لعدة أسباب لكن الأهضم منهن: البيوت الغريبة العجيبة لي موجودة فيها.

شايفين شي مرة بيت على شكل طيارة بلبنان؟ أو معبد يوناني أو بيت على شكل هرم pyramide؟

بتعرفوا إنو مزيارة ضيعة البيوت الغريبة العجيبة! يلا نكتشفها سوا!

مشوار زغير بمزيارة رح يحسسكن إنكن برات لبنان، سافرتوا على شي محل وعم تتأملوا جمال الهندسة والبيوت العظيمة وتاخدوا أحلى الصور.

يلا على مزيارة!

رح نبلش مشوارنا بزيارة “مزار إم المراحم” لنشوف جمال وعظمة هل محل. تم بناء مزار سيدة مزيارة عام 1979، وهوي مزار مريمي موجود على مدخل الضيعة. بس توصلوا رح تحسوا بالرهبة كأنكن طايرين بالسما. بتلاقوا بإم المراحم تمثال للعدرا بيحرسوا تمثالان للملايكة. على طول الطريق لي بتودي للكنيسة رح تلاقوا تماثيل رائعة الجمال لحديت ما توصلوا على تمثال معمودية المسيح يلي بيقصدوا الناس من كل لبنان، وعرس قانا والعشا السري. رح تمشوا بالجنينة الكبيرة المرصوفة بممرات بين الشجر وتشوفوا تماثيل بتحكي قصص من الإنجيل ومشاهد حية، متل الميلاد، والرحلة على مصر، ومعمودية المسيح.

ومن أغرب المباني كمان بالضيعة “البيت على شكل طيارة”، رح نشوفوا سوا ونتعرف على قصة هل تحفة الفنية. تم بناء هل بيت عام 1975 ، ويمكن اعتباروا أغرب بيت بلبنان وعلى الأكيد ما في متلو! بيتألف من طابقين، 30 شباك على كل جانب، محركان على كل جانح وهوي نسخة طبق الأصل عن طيارة إيرباص A380 ، حتى بتشوفوا دويرة نجوم علم الاتحاد الأوروبي لي تحولت لشباك زغير علي تمثال لمريم العدرا.

وهلق رح نكفي مشوارنا بمزيارة ونروح على ” البيت على شكل معبد يوناني أثري”، بتوصلوا بتلاقوا القناطر اليونانية العظيمة وبتحسوا حالكن للحظة بأتينا. هل بيت الشامخ والعملاق بيشبه المعبد الروماني ببعلبك وبطل على منظر كتير حلو.

وختام جولتنا رح يكون مسك عند “البيت على شكل هرم”، يعتبر هل بيت عبارة عن هرم فخم كتير وغريب بيتميز بعدة طوابق بيزغروا كل ما تعلوا طابق، والشبابيك كمان بيزغروا لتوصلوا على القمة. هل بيت رح يحسسكن بالعظمة أول ما تشوفوا بسبب التمثال لي رح يستقبلكن على الفوتة وعظمة البناء.

وين فيكن تاكلوا بمزيارة؟

مطعم لا كريببنات La Crepinette

الرقم: 005 570 06

مطعم مشاوينا

الرقم: 145 570 06

وين فيكن تناموا بزيارة؟

أوتيل مزيارة

الرقم: 521 570 06

جمعوا أصحابكن واستكشفوا هالضيعة المهضومة.