مشوا نتذكر ألعاب إيام زمان قبل عصر التكنولوجيا

بتتذكروا حياتنا كيف كانت قبل التكنولوجيا؟ تعوا نتذكر هل ألعاب البسيطة يلي كنا نلعبها بس كنا زغار وكانت تبقى فرحتنا لقرعنتا. ١. بيت بيوت هل لعبة كنا نلعبها تقريباً كل يوم مع ولاد جيران، نجمع بعضنا ونصير نتخايل حالنا فاتحين بيوت وعم نربي ولاد ونلعب دور البابا والماما ونفش خلقنا. ٢. النقيفة كنا نجيبها من غصن الشجرة بس يكون إلو فرعين، كنا نقصها ونحطلها كاوتشوكة من ميلة لميلة لتمغط نرجع نحط بحصة فيها وننقفها. ٣. زقوط عبارة عن خمس حجار كنا نلعب فيهن، نحط خمسة حجار على الأرض ونصير نشيل حجرة وحدة بإيدنا نرجع نشيل تنين وتلاتة لبالآخر نشيل خمس فرد مرة ولبيقشط من إيدو حجار يخسر. ٤. الغلة كنا نفرش الأرض خط غلل ويكون معنا غلل أو طس ومننقف علين وفي جورة ورا ولي بتزل الغلة تبعو بالجورة بكون أخد نقطة ولي بجمع أكتر شي نقط هوي لي بيربح. ٥. سيارة القصبة كنا نجيب قصبات من الجلّ ونعمل منها سيارة ونستعمل الشرايط الحديد لنعمل دواليب ونركب عليها ونلعب ونتسلى. ٦. عقد زهور بتذكروا بس كنا نحوش زهر دوار الشمس أو الكوك ليكو ونعمل منهن عقد وتاج أو نعملها للماما لنبسطها. ٧. غميضة هل لعبة كنا كمان نلعبها تقريباً كل يوم ونروح على الجل ونتخبى بين الشجر والأعشاب لنرجع على البيت ملوتين مقلعطين. ٨. الحميضة كان في فترة كل الولاد يجتمعوا بعض الضهر ويروحوا يحوشوا حميضة وياكلوا: مين بيذكر طعمتها؟ ٩. اللقيطة كمان كنا نجتمع مع كل ولاد الحي ونصير نركض ورا بعض لنلقط بعض ونوقع بالوحلات ونرجع ملوتين على البيت. ١٠. معلمة كنا كلنا نلعب لعبة المعلمة ونلبس تياب الماما والبابا ونصير نكتب بالطبشورة على الحيط ونجمع ولاد الجيران على الدرج. ١١. مغيطة كنا كمان نعمل لفة مغيطات ونلفها على إجرينا ونصير ننط من ميل لميل ولي بتعلق إجرو وما يقدر ينط يخسر. ١٢. لعبة الx كنا نرسم ٧ مربعات ونرقمهن ونكب بحصة زغيرة على هل المربعات ونصير ننط لنوصل للمرحلة الأخيرة. ١٣. لعبة الطيارة كنا نجيب ورق الجرايد ونعمل منن طيارة مع جوانح ونصير نطيرها. ١٤. لعبة قماش كنا نعمل بوبي من القماش ونحشيها قطن ونعملها شعرها من المغيطات المقصصين. ١٥. طيارة النايلون كنا نجيب كياس النايلون تبع الدكان ونعلقن بخيط ونطيرن بالهوا. وبس نزهق نفلت الكيس ونركوا يطير بالسما. مين كان يعمل هيك؟