تعرفوا معنا على أجمل المطاعم اليونانية بلبنان

إذا كنتوا من الأشخاص لي بتحبوا الأجواء والديكور والأكلات اليونانية وعم تنبشوا عن مطاعم يونانية بلبنان بتقدم أكلات البحر المتوسط وتاخدكن رحلة على جزر اليونان لتعيشوا لحظات متل الحلم، رح نعرفكن على أجمل المطاعم اليونانية بالبلد.

ومتل ما بتعرفوا بيشتهر المطبخ اليوناني بأطباقو الغنية بالخضرا والسمك وثمار البحر واللحوم المشوية الغنية بالتوابل والأعشاب متل ورق الغار والريحان والنعنع والزعتر وبالعطور وصلصات التوم والكزبرة والحامض وزيت الزيتون.

ولأن الأطباق اليونانية ما إلها مثيل، قررنا اليوم نعرفكن على ٣ مطاعم يونانية ساحرة الجمال مع منظر بطير العقل.

١. غريكو، جبيل

مطعم موجود على البحر ليعيشكن أجواء رومانسية على الآخر، بتلاقوا عندو أطيب أكل يوناني مع أحلى قعدة على البحر. يعتبر غريكو أفضل المطاعم اليونانية الأصيلة الموجودة بلبنان، بيتميز بموقعو الرائع على بحر حبيل، وبتقديم الأطباق المدهشة المستوحاية من البحر الأبيض المتوسط. بيتميز هيدا المطعم العصري بديكور بيطغي علي لون الأبيض وأجواء رومانسية ومأكولات ومشروبات طيبة وسحر يوناني ما بينوصف.

الرقم: 605 330 76

٢. ياماس، أنطلياس

ياماس مطعم يوناني جديد على البحر بقدم نكهات اليونان الطيبة على أطباق مثيرة الجمال. مينو ياماس بيتضمن مجموعة متنوعة من الأطباق اللذيذة متل المأكولات البحرية المشوية والمقبلات السخنة. استمتعوا بأطباق السوفلاكي اللذيذ والtzatziki الكريمي، وجربوا البقلاوة على الطريقة اليونانية إنتو وعم تسمعوا أجمل الألحان اليونانية وعم تتفرجوا على الرقصات الفولكلورية وتكسير الصحون.

الرقم: 352 030 03

٣. مطعم بيت، الصيفي-بيروت

هل مطعم بيجمع نكهات الشرق الأوسط واليونان بمحل واحد، بيتميز بالأطباق الشهية المستوحاية من البحر الأبيض المتوسط والجزر اليونانية. بيتألف مينو بيت من مجموعة من المأكولات البحرية الشهية المعمولة مع الخلطات السرية اليونانية ومقبلات باردة وساخنة، بالإضافة للسلطات والاسماك النيّة والحلويات. هل محل بيتميز بالجو اليوناني الفخم وبيتفنن بتوزيع الأطباق الشهية على الطاولات لرسم لوحات فنية مثيرة الجمال.

الرقم: 000 749 76