لقينا ١٤ مطعم بإهدن مع قعدة بطير العقل

إهدن مدينة غرقانة بالجمال،السياحة، التاريخ والحضارة والأكل الطيب، وصفها بعض المؤرخين والكتاب “بجنة عدن” وهيي فعلاً إسم على مسمى، حلوي متل إسمها ومكللة بالبيوت التراثية، المعابد الأثرية، الفنادق وأجمل المطاعم والمناظر. اليوم رح نعملكن جولة على أجمل المطاعم بربوع إهدن وناخدكن على كل زاوية من زوايا إهدن لتنقوا محلكن المفضل وتشوفوا الجواهر المخفية والمطاعم الساحرة.

١. ميس إهدن

مطعم ميس بيجمع الحضارات العريقة بأجمل قعدة وديكور مع سفرة عالمية ولمسة شرقية فيا شوية فخامة وأصالة. بقلب أوتيل زخيا بتلاقوا هل مطعم المميز لي بيتمتع بتراس بطير العقل مطرح ما رح تاكلوا وتستمتعوا بكل لقمة طيبة مع قعدة بطير العقل.

الرقم: 000 841 81

٢. صبح ومسا

الحديث عن جمال إهدن ما بيخلص، هل محل بوجود بأجمل نقطة بإهدن وحامل معو الأجواء الريفية وأطيب المأكولات اللبنانية والترويقة البلدية. أكيد بس تخلصوا أكل فيكن تشربوا فنجان قهوة وتستمتعوا بهوايات إهدن الحلوين.

الرقم: 707 281 81

٣. بامبو

مين مولع بالأكل الآسيوي؟ بامبو مطعم متخصص بالمطبخ الآسيوي وعندو قعدة حلوة كتير وأطيب مأكولات المطبخ الهندي والتايلاندي والصيني. بهالمحل بيجتمع الجمال والبساطة والطيبة ليقدموا أطباق شهية وكريمة مع ديكور ولا أحلى وقعدة من العمر، فريق عمل خدوم وخدمة ممتازة.

الرقم: 465 268 03

٥. مطعم تشاو Ciao Ristorante

مطعم تشاو بيتميز بديكور بيطغي علي الطراز الإيطالي، الألوان مع أضوية خافتة وأكل طيب وقهوة بتشق النفس. بقدم تشاو أكل لبناني وغربي وحلويات على أنواعها.

الرقم: 106 246 03

٦. بلاتانوس

مطعم لبناني بقدم كل أنواع المأكولات الشرقية وصحون الميزا مع لمسة سحرية وجو رومانسي. هل محل موجود بقلب ساحة الميدان الأثرية مطرح ما فيكن تعيشوا لحظات ما بتنتسى.

الرقم: 058 117 70

٧. حنين إهدن

متل ما بتقول فيروز “عندي حنين ما بعرف لمين”، بس لما تروحوا على هل محل رح تعرفوا إنو إهدن هيي الحنين الأبدي. هل محل بيتميز بالقعدة المميزة والأكل اللبناني التقليدي ومشهور بالكبة الزغرتاوية.

الرقم: 488 778 03

٨. باب الهوا

مطعم بياخد العقل قاعد على الجبل، الفيو رائع بتشوفوا منو أهدن كلها من فوق، مطرح ما السما قريبة ومطرح ما فيكن تسهروا على ضو القمر تحت النجوم وتتغزلوا ببعض وتعيشوا لحظات ما بتنتسى مع أطيب سفرة لبنانية وفنجان قهوة.

الرقم: 047 456 03

٩. مطعم وقهوة أسمهان

بس تميلوا على إهدن الحلوة رح يستقبلكن هل مطعم الأصيل المتخصص بالمطبخ اللبناني لي بيعمل كبة زغرتاوية غير شكل وبقدم أطباق غربية وأكلو بطير العقل وبيعمل سهرات وقعدات فنية رائعة وكمان عندو أطيب فنجان قهوة على الصبح.

الرقم: 900 414 71

١٠. تاج

من أعرق المطاعم الموجودة بإهدن، المناطق المجاورة بيقصدوا من ورا أكلو الطيب وقعدتو الحلوة وليحتفلوا بمناسباتن الخاصة. تاج عبارة عن مطعم راقي بقدم مأكولات لبنانية، القعدة عندو مثالية بتكشف على أجمل مناظر إهدن وخرج كل مناسباتكن.

الرقم: 069 203 71

١١. مطعم الوادي

هل محل بيشبه حكايات مخايل نعيمة وجبران خليل جبران عن لبنان لأن بيتمتع بتيراس بطير العقل فيكن تستمعوا بالإضافة للأكل الشرقي الشهي بقعدة بطل على جمال إهدن كلا، يعني منظر خلاب خاصة وقت غياب الشمس.

الرقم: 417 417 76

١٢. مطعم وكافي إهدن

بشارع سيدة الحصن قاعد هل مطعم المختص بتقديم المازة اللبنانية على أصولها وكمان بيتميز بوجود صالة كبيرة للولاد وأكيد، لقعدتو المطلة ولقمتو الطيبة. فيكن تشربوا العصير الفريش، تاكلوا قرص كبة أو تطلبوا شي بتحبوا وتقعدوا على التراس وتتفرجوا على الوادي وتنسوا هموم الدني.

الرقم: 486 141 76

١٣. بيت ستي

بيت ستي قاعد بشارع المغتربين ودايماً جاهز يستقبلكن وخاصةً إذا جايين من محل بعيد. هل محل معروف إنو بقدم أطيب كبة زغرتاوية مغمسة بلقمة حب وأكيد غيرها من الأطباق اللبنانية الشهية ومؤخراً فتحوا جنينة بيت ستي والمحل شرح وواسع وأكيد عندو أطيب لقمة ولي بجربوا مرة ما في ما يرجع مرة تانية وتالتة.

الرقم: 528 428 81

١٤. الفردوس

مطعم الفردوس تاكي على كتف الجبل، مع النسمات الحلوين والشجر والقعدة العتيقة، بقدم مازة لبنانية على الأصول بتجي على طاولتكن وبتخليكن تشبعوا منيح من الأكل اللبناني التقليدي.

الرقم: 444 560 06

إذا عبالكن تعرفوا أكتر عن إهدن، شوفوا كيف فيكن تقضوا نهار كامل بإهدن و تعرفوا معنا على أجمل الفنادق الموجودة بالمنطقة.