٩ مطاعم بحضن أجمل شلالات لبنان

“جنات عا مد عينك والنظر” قول بينطبق على الشلالات الموجودة بلبنان، المطاعم القاعدة على الشلالات موزعة على المناطق والضيع اللبنانية، بتتميز بقعدتها التراثية وبلقمتها الطيبة والبرودات الحلوين وصوت المي، إضافة للألعاب المخصصة للولاد، على صوت خرير المي وتحت فيات الشجر رح تلاقوا أجمل المطاعم الموجودة بأحضان الشلالات بلبنان، خلينا نعرفكن عليها.

١. منتزه و مطعم شلال الخيال، الجاهلية

هل مطعم قاعد على الشلال، بيتميز بجلسة بتشبه حكايات الخيال، مغمور بالطبيعة الخضرا ومحاط بالشجر والمي تحتكن والسما فوكن، بقدم مازة لبنانية على الأصول بتجي على طاولتكن وبتخليكن تشبعوا منيح وفيو بخلي القلب يدق.

الرقم: 058 601 71

٢. الشالوف، جزين

جزين من أجمل الضيع الموجودة بلبنان، بتتميز بشلالاتها الساحرة الجمال وغابات الصنوبر والبيوت العتيقة والمونة الطيبة واليوم رح نعرفكن على مطعم الشالوف لي بطل على الشلالات وبقدم مازة لبنانية مع منظر بطير العقل لتاكلوا وتستمتعوا بكل لقمة طيبة مع كاس عرق وريحة الطبيعة وجمال جزين.

الرقم: 774 781 07

٣. شلالات نبع مرشد، المختارة

منرجع على الشوف الحلوة ومنروح على مطعم شلالات نبع مرشد لي بيتميز بقعدة بطير العقل على الشلال بين الشجر، رح تلاقوا حالكن قاعدين على المي وقبالكن أطيب لقمة لبنانية وحلو وكاس عرق.

الرقم: 220 310 25

٤. مطعم الطواحين، بساتين العصى

متل جنة زغيرة حد شلالات بساتين العصى قاعد هل مطعم مطرح ما المي الصافية بتصب لتسقي الخوابي. بتوصلوا بتشربوا شي لتبوردوا بترجعوا تتأملوا جمال المكان وهدوء الطبيعة وبتاكلوا أطيب أكل لبناني على الأصول. بس تخلصوا أكل بتشربوا فنجان قهوة على الشلال والمي عم تمرق. فيكن تعملوا كزدورة لتهضموا حد الشلال وترتاحوا وتغطسوا إجريكن بالمي متل الأفلام.

الرقم: 021 904 03

٥. جنة بعقلين، بعقلين

بتنزلوا على مطعم جنة بعقلين وبتوصلوا على طاولتكن، هونيك ناطرتكن قعدة بتشبه الجنة على الأرض، رح تحسوا حالكن قاعدين بالشلال. بس ما وقفت على الأكل، لأنو كل لقمة بتاكلوها بجنة بعقلين رح تمبسطوا فيها من جمال الطبيعة الخلابة يلي حواليكن، بس تخيالوا إنكن قاعدين وشايفين شلالات بعقلين بوجكن، ونهر بعقلين دغري تحتكن.

الرقم: 669 924 03

٦. نهر الشير، بقرزلا

نهر الشير من أجمل المطاعم الموجودة بعكار، بقدم مأكولات لبنانية تقليدية وأطيب شفة قهوة، بتجوا بتستمتعوا بالأكل الطيب على صوت المي وبشدكن

جمال الشلال وبتعيشوا راحة نفسية بوحدة من أجمل مناطق لبنان.

الرقم: 851 821 70

٧. شلالات النور، الضنية

هلق رح نكفي مشوارنا على مطعم شلالات النور يلي موجود بمنطقة سير الضنية بالشمال ولي موقعو بياخد العقل. مطعم شلالات النور من أجمل مطاعم لبنان، بقدم أكل لبناني على أصولو ولقمتو غير شكل، من المازة للمشاوي للحلو للأرغيلة للفواكه للقهوة. هل مطعم عمرو فوق ال20 سنة وهوي مطعم صيفي بيستقبل بين 250 و300 شخص لتقضوا وقت ممتع ومميز مع الناس لي بتحبوهون وتستمتعوا بالشلال والمي الجارية.

الرقم: 956 575 03

٨. الشلالات الزرقا، بعقلين

مطعم الشلالات الزرقا معلق على أجمل شلالات لبنان، بقدم أكل لبناني تقليدي ولقمتو غير شكل. المطعم بيفتح صيف شتا، بس مننصحكن تطلعوا بأقرب وقت لتستمتعوا بالطقس الحلو والبرودات. وإذا عبالكن تعيشوا أجواء رومانسية على الآخر، فيكن تطلعوا على شخطورة بنص المي وتاكلوا وتطلعوا ببعض والمي تحتكن.

الرقم: 301 560 03

٩. شلالات عنجر، عنجر

من الشوف وجمالها لعنجر وعنفوانها، لنتعرف على هل مطعم المميز بأحضان شلالات عنجر، بيتمتع بقعدة مميزة على الشلال والأكل الطيب وصوت المي الجارية لي هوي علاج نفسي. هل مطعم كمان مناسب لجميع مناسباتكن وبحضرلكن سفرة غير شكل وفي كمان أوتيل وصالة ألعاب للولاد.

الرقم: 753 620 08

إذا عبالكن بيكنيك بالطبيعة مع قعدة بعيدة عن الضجة والعجقة والهموم، شوفوا هل مطعم المميز ببرمانا.