١٢ مواقف لبنانية منقول فيها “حبيبي” أبداً ما دخلها بالحب

أحب شي ع قلبو للبناني يصرعك بكلمة حبيبي. مش بالضرورة يقلك ياها لانو إنت عنجد حبيبيو…يمكن مش طايق خلقتك بس بدو يقولها. حتى نكون واضحين شوفو معنا هالمواقف يلي منقول فيها حبيبي وما دخلها بالحب لا من بعيد ولا من قريب. ١- لما يكون في مواقف فيها عدوانية من تحت لتحت “أي حبيبي خلصنا شو في” بالعادة بتسمعها من موظفة الوزارة الختيارة يلي دايق خلقها ع الصبح. ٢- لما يكون في أي شي خصو بطلبية الأكل “تفضل حبيبي، صحتين” أفخم “حبيبي” بتسمعوها بحياتكن هي لما معلم الشورما يعطيك السندويش الخطيرة مع اكسترا توم. ٣- لما يصير خناق “لاااااا حبيبي، مين مفكر حالك؟!؟!؟” لا لازم تكسرلو راسو. ٤- بكل دعاية للسياحة متل دعاية “Habibi! Come to Lebanon” المهاجرين غلطوا وصدقوا الدعاية. ٥- لما يجو السياح الأجانب و بدن يحفظو كم كلمة لبنانية “خا-بي-بي” و بكونو حافظين اللفظ عن الغوغل. ٦- لما تطلع بالتاكسي بين كل كلمة وكلمة سواق التاكسي بقلك حبيبي. ٧- لما تطلب الحساب بالمطعم يلي ح يطفرك ع الآخر بتطلع معك إنت و محزق شوي “حبيبي، الحساب إذا بتريد”. ٨- لما تنسى اسمو للشخص ومستحي ترجع تسألو يعني جاد أو أحمد شو ح تفرق؟ إذا قلتلو حبيبي مش ح ينتبه. ٩- لما يوقفك الشرطي ويعطيك ضبظ سرعة “إي حبيبي وين الدفتر؟ بدنا نعذبك تصف ع جنب”. ١٠- لما يصير معك مصيبة وأبداً مش وقتها “يا حبيبييييييي!!! من وين إجتنا هالمصيبة هلق؟” ١١- لما تسمع خبرية كتير قوية وخطيرة “يا حبيبيييييييييي” بمعنى أوف يا لطيف. ١٢- لما صاحب الدكانة يطوشك “حبيبي شو عايز” طب فيك تعبيلي الكيس وتخليني فل؟ مستعجل.