٧ مسلسلات لبنانية وعربية مأخودة عن مسلسلات وأفلام أجنبية

انشهرت آخر فترة العديد من المسلسلات اللبنانية والعربية على الساحة العربية ووصلت على بيوتنا بس مش الكل بيعرف إنو العديد من أفكار هل مسلسلات مستوحاة أو مقتبسة من مسلسلات وأفلام أجنبية، تعوا نتذكر أشهر هل مسلسلات يلي طبعت ذاكرتنا.

١. عروس بيروت

عروس بيروت النسخة اللبنانية للمسلسل التركي “عروس اسطنبول” يلي بيتضمن أحداث مليانة إثارة وتشويق من بطولة ظافر العابدين، كارمن بصيص وتقلا شمعون. بدور أحداث المسلسل حول قصة حب بين ثريا وفارس واجهت صعوبات كتيرة بسبب إم فارس ليلى يلي بتوقف حاجز بيناتن، بسبب شخصيتها المتسلطة.

٢. الحب الحقيقي

مسلسل لبناني درامي اجتماعي مستوحى عن قصة المسلسل المكسيكي “الحب الحقيقي” يلي انعرض على شاشة الLBC بالزمانات، بطولة باميلا الكيك ونيكولا معوض وجان دكاش، العمل إخراج جوليان معلوف يلي لعب دور “ركان” ولي وصل للشهرة على الساحة اللبنانية من بعد هل مسلسل وانعمل منو جزء تاني ولاقى رواج كبير كمان. بيحكي هل مسلسل عن قصة حب بين ركان ونورا لي تجوزوا من دون حب بالبداية لكن مع الوقت انقلبت الأحداث واستطاع ركان يربح قلب نورا بس عودة حبيبها السابق على حياتن بتخلق مشاكل كتير وهيك بتتسارع أحداث المسلسل.

٣. روبي

مسلسل روبي للنجمة سيرين عبد النور مقتبس عن مسلسل مكسيكي إسمو “روبي” تم دبلجتو للعربية وعرضو على الشاشات الفضائيات بوقت سابق، أما النسخة اللبنانية للمسلسل فكانت من بطولة سيرين عبد النور، ومكسيم خليل، وأمير كرارة، وتأليف كلوديا مارشليان، وإخراج رامي حنا. بتحكي قصة المسلسل عن قصة حب بين سيرين ومكسيم ما بتتكلل بالزواج بسبب طمع سيرين أو روبي بثروة أمير أو “تامر” يلي بينغرم فيها وبقرر يتجوزها من دون ما يعرف حقيقة مشاعرها تجاه صديقو المقرب عمر لي لعب دورو مكسيم خليل.

٤. لو

كلنا منتذكر غنية مسلسل “لو” بصوت إيليسا يلي حققت نجاح كاسح بلبنان والعالم العربي. لو من أشهر المسلسلات الرمضانية على الإطلاق من بطولة الممثلة نادين نسيب نجيم وعابد فهد ويوسف الخال، تم اقتباسو عن فيلم Unfaithful وبيحكي عن قصة حب سرية بتجمع بين نادين نجيم لي حاسة بفراغ عاطفي بسبب غياب جوزها عنها وانشغالو بالعمل والممثل يوسف الخال الرسام الطموح.

٥. تشيلو

هل مسلسل بطولة نادين نسيب نجيم ويوسف الخال يلي تعاونوا سوا بتجربة درامية جديدة بعد ما انضم لفريق التمثيل الممثل السوري تيم حسن. تشيلو مقتبس عن الفيلم الأميركاني Indecent Proposal وبيحكي عن قصة ياسمين عازفة التشيللو الشهيرة لي عايشة حالة صراع مع مشاعرها تجاه رجالين، الأول جوزها آدم عازف البيانو، والتاني رجل أعمال إسمو تيمور ساعدها بتأسيس مشروع عمرها بعد ما فرض عليها شروط.

٦. لعبة الموت

مسلسل “لعبة الموت” بطولة عابد فهد وسيرين عبد النور وماجد المصري مأخود عن فيلم Sleeping With The Enemy وبيحكي عن رجل الأعمال عاصم غريب لي عايش هاجس الخوف من الرجال المحيطين بمرتو الحلوة نايا يلي بغار عليها للموت وبيمنعها تعمل حيلا شي من دون موافقتو وبيحبسلا حريتها لحديت ما تقرر نايا بيوم من الإيام تهرب بالبحر لتخلص منو فبتروح تبلش حياتها من جديد بمصر من خلال شغلها بشركة هندسة بيملكها المهندس المعروف كريم الشافعي يلي ببلش يهتم لأمرها ويكنلها مشاعر.

٧. نص يوم

مسلسل “نص يوم” مقتبس عن فيلم The Original Sin بطولة نادين نجيم وتيم حسن، بيحكي عن وفاة زلمي عندو ثروة ورتها لإبنو ميار لي بقرر يرجع من بلاد الإغتراب ليزبط كل الوراق والمعاملات لكن من دون سابق إصرار بيوقع بحب بنت إسمها يارا وبقرر يلغي سفرتو كرمالها بس بيرجع يكتشف إنو حبيبتو لعوب وهيك بتبلش تتسارع الأحداث.

شوفوا معنا هل ١٧ غنية أجنبية المأخودة عن أغاني عربية.