يلا عالجنوب: ١٥ مطرح سياحي جنوبي

مين مشتاق للهوا الجنوبي والقعدات اللذيذة؟ خلينا نروح سوا ع مشوار حلو على الجنوب ونشوف ١٥ مطرح سياحي لأهضم كزدورة بتفتح النفس.

١- قلعة شقيف الأثرية، النبطية

على ارتفاع ٧٠٠ متر، هيدي القلعة الأثرية صامدة من أيام الصليبيين. نشأت كحصن عسكري مهم للصليبيين والمماليك والعثمانيين، بتتميز بموقعها الإستراتيجي يلي بيطل على نهر الليطاني و مرتفعات الجولان وشمال فلسطين. حالياً، بتعتبر القلعة موقع كتير حلو للسياحة.

٢- سوق صيدا العتيق

صيدا العريقة من أقدم المدن الساحلية بلبنان و قدرت تحافظ على أسواقها العتيقة يلي صارت معلم سياحي بحد ذاته. تجولوا و تسوقوا بعجقة هيدي المدينة، الوقت بيقطع بسرعة.

٣- قلعة صيدا

واجهة صيدا البحرية وقلعة بين البحر والشط، المنظر من داخلها رائع للبحر المتوسط ومكان مميز لتشاهدوا غروب الشمس.

٤- قصر دباني – صيدا

قصر أرستقراطي وعثماني من ال١٧٢١ وانبنى ع ديكور هيدي الفترة من الزمن، من البلاط المزخرف وخشب الأرز بالسقوفيات. حلو تتجولوا فيه وترجعوا شوي بالزمن.

٥- متحف الصابون – صيدا

فيكن تتعرفوا على صناعة وتاريخ هيدي الحرفة للمشهورة بصيدا من داخل المتحف. بتشوفوا كتير أنواع صابون مشغول ع الأصول.

٦- خان الفرنجي – صيدا

قريب كتير ع السوق ويعتبر من أجمل الخانات على عصر فخر الدين يلي حافظت على تفاصيلها. بتلاقوا بهيدي الجوهرة من القرن السابع عشر قناطر عالية و باحات واسعة و نافورة مي أثرية.

٧- جزيرة زيرة – صيدا

بتبعد هيدي الجزيرة الصخرية عن شط صيدا حوالي ال ١.٥ كيلومتر، بتقدروا توصلولا بالقارب: مطرح كتير حلو للإستجمام والسباحة وكمان لتنفصلوا عن العالم.

٨- حمام الجديد – صيدا

حمام أثري قديم بتلاقوا فيه لوحات فنية وزوايا عتيقة وبتتعرفوا ع تاريخ وتقاليد الحمامات خلال زيارتكم.

٩- أحياء صور القديمة

أحياء شعبية وأثرية فيها لمسات فنية وألوان جميلة، بتحسوا حالكن بفيلم قديم لما تتمشوا فيها.

١٠- آثار صور العريقة

صور من أجمل المدن الساحلية بلبنان ومشهورة بآثارها الفينيقية يلي ما بتلاقوا منها بالعالم: مكان بيجمع ما بين التاريخ والبحر والجمال.

١١- كروم العنب – جزين

بساتين واسعة وشاسعة لتضيعوا فيها وتنسوا حالكن ولتتعرفوا على صناعة النبيد المشهورة بلبنان.

١٢- نبع جزين

نبع مي رايق وهادئ، كتير حلو للضهرات والأمسيات مع الأصحاب.

١٣- قصر فريد سرحال – جزين

قصر بجزين معروف بزخارفه وعمارته الرائعة، بتشوفوا الإبداع الفني والجمال بأدق التفاصيل. مكان كتير حلو للتصوير.

١٤- غابة الصنوبر بكاسين

أكبر حرج لأشجار الصنوبر بلبنان و بالشرق الأوسط، بيحتوي ع اكتر من ١٠٠ ألف شجرة. مكان ساحر لتنسوا حالكن بالطبيعة أو تطلعوا تتمشوا وتخيموا مع الأصحاب.

١٥- شلالات جزين

مفضل تشوفوها بالشتوية لما تكون المي متدفقة. مكان بطير العقل وبرد الروح!

وإذا عبالكن تناموا بالجنوب، شوفوا هل ١٤ من أجمل الفنادق الموجودة بجنوب لبنان .