ياماس: قطعة من اليونان بقلب لبنان

إذا كنتوا من الأشخاص لي بتحبوا تجربوا مطاعم جديدة، رح نعرفكن اليوم على مطعم يوناني ساحر رح ياخدكن رحلة ممتعة على اليونان على أنغام الغنية اليونانية الشهيرة “ماغاباي”.

أول ما تفوتوا على ياماس رح تحسوا حالكن انتقلتوا على سانتوريني. من الديكور للقعدة للأكل والزهور، التجربة ما لازم تروحوها عحالكن.

ياماس جوهرة مخفية على البحر بقدم نكهات اليونان الطيبة على أطباق مثيرة الجمال. مينو ياماس بيتضمن مجموعة متنوعة من الأطباق اللذيذة متل المأكولات البحرية المشوية والمقبلات السخنة. استمتعوا بأطباق السوفلاكي اللذيذ والtzatziki الكريمي، وجربوا البقلاوة على الطريقة اليونانية إنتو وعم تسمعوا أجمل الألحان اليونانية وعم تتفرجوا على الرقصات الفولكلورية على ألحان البزق.

بيخلق مطعم ياماس أجواء مختلفة لزوارو من خلال استحضار عادة يونانية قديمة ما رح تتخيالوا فيكن تعملوها بلبنان.

فإذا عبالكن تعيشوا تجربة يونانية خيالية، ما إلكن غير تروحوا على ياماس وتشاركوا بتكسير الصحون إنتو وعم ترقصوا على أنغام الموسيقى اليونانية مع فرقة موسيقية محترفة. بتطلعوا على البيستا بتلاقوا الأرض كلها صحون مكسرة بس أبداً ما تعتلوا هم لأن الشعور كتير حلو والقزاز ما بفوت بالإجر وبترقصوا على لحن الزوربا.

لتكمل رحلتكن على اليونان بياماس، لازم تجربوا مشروب الأوزو لي هوي عبارة عن مشروب روحي مصنوع من العنب واليانسون، يعني فيكن تقولوا عنو متل العرق على الطريقة اليونانية. أصلاً ياماس إسم يوناني وبيعني “كاسكن”، وأكيد ما بتحلى الجلسة من دون ما تاخدوا صور حلوة لأن المكان حلو كتير مستوحى من عالم البحار، مزين بالأبيض والأزرق وتماثيل الآلهة اليونانية: أكتر من هيك قطعة من اليونان بقلب لبنان!

لكل العشاق، ياماس هوي المكان المناسب لتعيشوا حبكن من أول وجديد أو لتعترفوا بحبكن لأول مرة وتاخدوا البركة من آلهة الحب أفروديت.

إذا عبالكن تروحوا تجربوا الأجواء اليونانية، لازم تحجزوا قبل بجمعة لتلاقوا محلات وأهم شي تروحوا مرتبين لأن المحل كتير مرتب، اتصلوا على

352 030 03.

العنوان: أنطلياس سنتر أيشتي Aïshti

لتعرفوا أكتر عن المطاعم اليونانية، حضرنالكن دليل عن المطاعم اليونانية الموجودة بلبنان: تعرفوا معنا على أجمل المطاعم اليونانية بلبنان.