أهضم المسلسلات اللبنانية الكوميدية لي ربينا عليا

مين ما بيعرف هل مسلسلات؟ إذا ما بتعرفوها يعني روحتوا على حالكن أجمل إيام الطفولة بلبنان. خلونا نتذكر أجمل وأهضم المسلسلات الكوميدية يلي كبرنا عليها ونذكر أحلى لحظات الطفولة بلبنان لي ما رح ترجع.

١. مش ظابطة

بطولة باسم معنية ونادين الراسي ووسام صباغ وليليان نمري، قصة المسلسل بتحكي عن محامي لبناني، رجع مع مرتو اللبنانية الأسترالية على لبنان من أستراليا ليكفوا حياتن فبيكتشفوا إنو الحياة بلبنان غير وفيها وسايط وصعوبات كتير وحتى الناس غير ومرتو بتستغرب تعامل عيلة جوزها معا، بس بالآخر ورغم كل شي بتقرر ضل بلبنان.

٢. الدنيا هيك

مسلسل لبناني كوميدي من كتابة محمد شامل ومن أبرز الشخصيات الرئيسية في زمرد وعزيز ووردة وبلبل المزيكاتي وشويكار وكوكو وعلوش بيطرح عادات وثقافات ومشاكل المجتمع المدني والريفي اللبناني بحقبة أواخر السبعينات والتمانينات.

٣. أبو سليم الطبل

من أشهر المسلسلات اللبنانية الكوميدية بتاريخ لبنان، ضحك كتار من الناس وكانوا ينطرو مناطرة ليضحكوا من قلبن. بلشت فكرة أبو سليم الطبل على المسرح مع صلاح التيزاني رجعوا انتقلوا على التلفزيون، بطولة صلاح التيزاني( أبو سليم)، أسعد النعسان، فهمان أبو الفهم، شكري شكرالله، درباس، وكتار غيرن وكان للمسلسل أكتر من اسم متل سيارة الجمعية، كل يوم حكاية، الأبواب السبعة و المليونير المزيف و أبو سليم 2000 .

٤. عيلة على فرد ميلة

مسلسل مرتي وأنا بحلة جديدة مع شخصيات جديدة ومغامرات طريفة ومهضومة بأسلوب شيق. بلشت هل سلسلة مع فادي وكارين “بمرتي وأنا” ورجعوا عملوا “مرتي وبنتي وأنا” و”عيلة على فرد ميلة” وفيلم “مادام بامبينو”. المسلسل عبارة عن يوميات couple مجوزين جديد فادي وكارين، بيغلب على حياتن طابع كوميدي وطريف. فادي طبعو رايق ومهذب وحقاوي، أما كارين فطالعة عصبية وعطول عندها طلبات ما بتخلص وهيك بقضوها “دبي وعصري” كل الوقت هيي وفادي وأضحك شي بس يفوت الجار وجيه على الخط.

٥. مرتي وأنا

أشهر شخصيات كوميدية لبنانية بالألفية على الإطلاق “كارين” و”فادي”، والحلو إنو الأبطال كانو مجوزين بالحقيقة والمسلسل كان يحكي عن مغامراتن اليومية. للأسف اليوم انفصلوا فنياً وعائلياً وكل حدا مشي بطريق وكارين صارت بطلة ومؤلفة من رواد الدراما اللبنانية وفادي قرر يستمر بمجال الكوميديا.

٦. فادي وراضي

من بعد ما حقق النجم فادي اندراوس نجاح كبير بستار أكاديمي وصار النجم المفضل عند الصبايا، انطلق بعالم الفن وقرر يخوض تجربة التمثيل كمان إلى جانب الممثل القدير جورج خباز. هل مسلسل الكوميدي بيحكي عن المغامرات اليومية لولاد العم “فادي” و”راضي” والصراع على الورتة وكمان في نفحة رومانسية لأن فادي بكون مغروم بفيفو وبيطلع إنو مدير أعمالو حدا خطير وكل الناس لي حوالي طمعانين في.

٧. محلولة

بطولة الممثل القدير صلاح تيزاني لي بيلعب دور “الجدو” ووسام صباغ وفيفيان انطونيوس، بتحكي قصتو عن وسام لي طلق مرتو وهوي مزيع على التلفزيون ومدير مسرح عايش مع إبنو جاد وجدو أبو سليم يلي معلقين في كلن بالعيلة والجارة لي بضحك أم نعيم شوفارة تاكسي وبنتها كوكو لي عطول بتعمل مشاكل. أكيد بقى وسام يحب مرتو وهيي كمان تحبو وإبنن جاد بحاول يرجعن لبعض. رح تلاقوا كمان هل عمل على شكل مسرحية.

٨. بنات عماتي وبنتي وأنا

مسلسل كوميدي بيحكي عن قصة مرا طلقت جديد بتلعب دورها ورد الخال وجوزا لي هوي يورغو شلهوب، عندن بنت مهضومة كتير وعطول في صراع بينها وبين جوزها وصاحبتو. بضل ورد الخال مغرومة بجوزها السابق وهوي كمان وكل المسلسل بدور أحداثو عن محاولات تقرب بيناتهم بتفشل. لي بضحك إنو بنت الكوبل الزغيرة كبرت اليوم وصارت ممثلة معروفة إسمها روان طحطوح.

٩. جميل وجميلة

“جميل وجميلة، طبعاً يا جميلة”، مين ما كان مغروم بغنية هل مسلسل؟ بقولوا عن جميلة حلوة وكلها مالحة، هيي بنت بريئة الكل بحاول يستغل جمالها وبساطتها وطيبة قلبها، وهيي ما بتعرف شو عم بصير وبتخلي الناس يستغلوها، بإستثناء جميل يلي بينغرم فيها عنجد وبقرر يتجوزها رغم معارضة عمتها.

١٠. غنوجة بيا

هل مسلسل الكوميدي رافق طفولتنا وبقي محفور بذاكرتنا. مين ما بيتذكر قصة حب رنا بركات وطارق فياض؟ ونادين وشادي؟ وعدنان لي صار شخصية أسطورية انطبعت براس كل لبناني. كنا ننطر مناطرة نهار الأربعا لنحضرو وبعدنا لهلق منستمتع بس نحضر الإعادة على الLBC وبسبب نجاح هل مسلسل، انعمل جزء فيلم كمالة لقصتو كسر الأرض.

١١. فاميليا

مسلسل كوميدي فيو نفحة رومانسية بيحكي عن قصص حب تلاميذ الجامعات والصعوبات لي بتواجها العيل وبسلط الضوء على قصة الحب الشهيرة بين نبيلة شقير ورمزي خياط. هل مسلسل شكل نقلة نوعية بتاريخ الكوميدية اللبنانية لأن طرح قضايا إجتماعية بكادر كوميدي وأهمها قضايا حقوق المرأة.

١٢. ساعة بالإذاعة

بطولة جورج خباز وفيفيان انطونيوس ولورا خباز وليليان نمري وليال ضو. بسلط الضو على النشاز الموجود بالمجتمع الفني وغياب الموهبة الطبيعية من خلال يوميات موظفين إذاعة محلية بيلتقوا كل يوم بشخصية مختلفة وأغلب الفنانين لي بشوفوهن بيطلعوا فاقدين حس الموهبة والشغف وكل هدفن الشهرة والمصاري وعمليات التجميل والتسويق لحالن.

١٣. عبدو وعبدو

مسلسل لبناني بطولة الممثل القدير جورج خباز ويورغو شلهوب بيحكي عن مغامرات ولاد خالات عايشين سوا ما بيشبهوا بعض بشي بس بحبوا بعض بطريقة كتير مهضومة. عبدو دريس وبقضي وقتو مع الكتاب ومغروم ببنت إسمها ميمي بس ما بيعطيها وج لما يلتهي عن درسو، أما بودي فهوي العكس تماماً، ما بحب الدرس أبداً وبقضي معظم وقتو من وحدة لوحدة عم يتسلى ويجغل على البنات، فعلاً أنجح عمل لجورج خباز على الإطلاق.

١٤. حلوة وكذابة

بطولة زياد برجي وداليدا خليل ومارسيل مارينا وجورج دياب ورانيا عيسى. داليدا بنت حلوة كتير بس كذابة كتير، مغرومة لشوشوتها بالفنان “رمزي ديب” من قبل ما تعرفوا حتى، يلي كمان كتير كذاب ومصاحب أكتر من بنت بنفس الوقت. بتخبر داليدا رمزي ورفقاتها بالجامعة إنها غنية كتير وهيي جاية من عيلة فقيرة وبصير يحبها مع الوقت مع إنو كاشف كل كذباتها. استكمل المسلسل بسبب نجاحو الكبير بفيلم سنة 2013.

١٥. حريف وظريف

كتابة مروان نجار، إخراج نبيل بشارة وبطولة وليم حسواني. مسلسل كوميدي غنائي بيحكي عن تاجر محنك وذكي ومهضوم بيعرف كيف يتحدى مشاكل المجتمع المحرجة وبيعرف يطلع من المشاكل متل “الشعرة من العجينة” بطريقة رهيبة.

١٦. المعلمة والأستاذ

مسلسل كوميدي ربيوا علي الجيل الجديد والقديم، بيحكي عن قصة حب بين معلمة وأستاذ بعلموا تلاميذ كبار بالعمر بمدرسة محو الأمية. الحلو بهل مسلسل إنو قد ما نحضرو ما منزهق منو لأن المشاهد لي في بتفوت على القلب بشكل مش مقبول. أهم الشخصيات يلي انحفرت بذاكرتنا “بيارو”، “أماليا”، الناظرة “ظريفة”، “يوسف” إبن الماما و”أبو العبد”.

تعرفوا معنا كمان على ٦ شخصيات لبنانية وصلوا للعالمية.