تعرفوا على أكلات شعبية من مختلف الضيع اللبنانية

كل ضيعة بلبنان عندها أكلة شعبية خاصة فيها ما بتلاقوها بغير ضيعة وهل أكلة بتحسوا صارت جزء من هوية ولاد الضيعة ويمكن أطيب أكلة عندن، خلينا نشوف هل أكلات الشعبية الغريبة العجيبة من مختلف ضيع لبنان ونشوف من شو مكونة.

١. القبيات

سامعين بضيعة القبيات بالشمال؟ بتتميز بجمال طبيعتها ومواقعها التاريخية وطيبة قلب أهلها وأكلها الطيب. القبياتيي عندن أكلة معروفة كتير إسمها “طبيخ” ومش متل ما البعض بفكروا إنو طبيخ يعني طبخة عادية، لاء. طبيخ عبارة عن أكلة بقولوا جايي من العثمانيي وإسمها “قاش” بالتركي وبيعني طبيخ، معمولة من لبن مطبوخ وقمح.

٢. حصرون

بعدنا بالشمال الحبيب لنتعرف على أكلات حصرون التقليدية. حصرون المعلقة على كتف وادي قنوبين غنية بالمونة البلدية والبيوت العتيقة والناس الطيبين، وسوقها العتيق الأثري بيحكي ألف حكاية وحكاية. الطبخات الحصرونية لي رح تحبوها كتير، معكرونة بتوم لي هيي عبارة عن زلابية معكرونة مطبوخة بصلصة الليمون والتوم و أكلة المعمورة من الرز بالخس والحمص و أكيد المونة والطبخات البلدية.

٣. راشيا الوادي

من الشمال منروح صوب البقاع لنشوف ضيعة راشيا الوادي شو مخبايتلنا. راشيا الوادي ضيعة طبيعية وعتيقة وغنية بتراثها الحي بتتميز بمهارات الحرفيين بصناعة المجوهرات الفضية وبصناعة المونة والدبس والأكل الجبلي. أما الأكل التراثي، فينا نقول في من جميعو وفينا نسميها أكلات ريشانية متل أكلة بليلة باللبن، عبارة عن حمص مطبوخ بالكمون وعصير الليمون واللبن وأكلة الخبوسة، عبارة هن قطع مغمسة بالدهن ودبس العنب.

٤. حمانا

حمانا ضيعة الكرز والجمال، بتشبه الوردة الحمرا لأن بيوتها قرميد وحجر وثمرتها الحمرا موجودة بكل بيت. مش بالصدفة بقولوا عن حمانا ضيعة الكرز لأن كل شي فيها بيحكي عن المي والجمال والكرز، بتبقى الثمرة الحلوة لي مزينتها الأصل كلو. الأكلات الحمانية الطيبة صارت مصنوعة من الكرز وعم يعملوا اختراعات جديدة صارت من هوية الضيعة متل المربى والكومبوت على كرز وحتى صلصلة الباربكيو على كرز لي بتلاقوها عند جنينة جميل بالضيعة.

الرقم: 492 574 03

٥. الضيع الجنوبية

بس تلقوا ضيع الجنوب ضيعة ضيعة، رح تشوفوا إنو المجدرة الحمرا حبيبة قلب الكل وهيي اختصاص جنوبي بإمتياز، كل ست بيت جنوبية موهوبة في. المجدرة الحمرا عبارة عن عدس زغير مقلى مع بصل ليتحمر مظبوط ليعطي اللون الأحمر للأكلة ولهيك إسمها مجدرة حمرا وبينزدلها بعدين برغل محل الرز وبتنطبخ على نار هادية من دون تخبيص وخلط العدس.

٦. بينو

منروح على عكار لنشوف ضيعة بينو المنسية لي جمالها ما فينا ما نتوقف عندو. بينو ضيعة ضايعة بين الطبيعة الخضرا والشجر لي غامرها من كل الميلات وبتتمتع ببحيرة ساحرة الجمال وببيوت عتيقة عمرها ميات السنين. هل ضيعة بتتميز ببعض المأكولات الشعبية متل الكبة التقليدية لي بقولولها ولاد الضيعة الجرماش وأكلة اللحم بالخل لي هيي عبارة عن لحم بقر مطبوخ مع بصل، حمص وسفرجل، ومقدم مع كبة.

شوفوا كمان شو معنى أسامي هل-١١ ضيعة بالجنوب؟