لقينا ٧ مطاعم بالقبيات مع قعدة بتطير العقل
بأحضان الطبيعة بين شجر الأرز والصنوبر قاعدة هل ضيعة الساحرة الجمال. توجت ضيعة القبيات من سنتين على عرش الجمال وتم اختيارها كأجمل ضيعة بلبنان ولي زاير هل ضيعة بيعرف بالفعل إنها الأجمل، بتتميز بمناخها وطبيعتها ومواقعها الأثرية والروحية، أكلها الطيب وأهلها القريبين للقلب. من بعد ما خبرناكن عن أجمل المطاعم الموجودة بحمانا، اليوم رح نكفي على القبيات لنخبركن شوي عن ضيعة الصنوبر والأرز والجمال ونستكشف سوا المطاعم الموجودة بأحضان هل جوهرة ونتعرف على مميزات كل محل.
١. حطبة ونار
هل محل رح يستقبلكن على الوصلة، بتفوتوا بتلاقوا بيت حجر مكنكن بيعمل أطيب شاورما بالعالم. الإحساس لي رح يرافقن بهل محل كتير حلو خاصةً بس تكون تالجة الدني برا وسقعة كتير والدفا عفا جوا حد الحطبة والنار. هل محل بيعمل spécialité بس موجودة عندو ولي هيي شاورما التنور على الحطب شي بياخد العقل. خبزة محشية شاورما طازة خالية من الدهن مع أطيب تتبيلة وكاسة عيران بلدي. الشاورما عند حطبة ونار بالطول والعرض وبطول العمر وصاحب المحل طوني أنطون كريم كتير وبيعرف يدللكن على الأصول، بيعمل شاورما ومناقيش من حواضر الضيعة وبحضر ترويقة ملوكية إذا مشتهيين على الأكل الطيب من الصبح.
الرقم: 798 758 03
٢. هيكل الشنبوق
من مدخل الضيعة رح نطلع بسرعة على الجرد لنشوف هل مطعم الساحر المخبى بالطبيعة. هون رح تحسوا حالكن واقفين بالسما على إجر ونص، وقد ما نحكي مش رح يوفي الكلام حق المطعم من جمال، محاط بالشجر والخضار من كل الميلات. عمو هيكل كرس حياتو للضيعة وعمل أجمل لوحة فنية ممكن تتخيلها عينكن ويدوقها تمكن. هل مطعم بيشبه المطاعم الموجودة بسويسرا، رح ياخدكن على عالم تاني ويخليكن تعيشوا الهدوء والسكينة على وسع المدى، أكل الضيعة مع قعدة بتفرفح القلب. فنجان القهوة والشراب بعد الغدا ما بينتسى. كل شي بيتحضر على الإيد ومن الجنينة حتى الخبز من القلب بيتقدم.
الرقم: 184 686 81
٣. كرم
هل محل المهضوم موجود بالساحة، بيعمل أكلات بيتوتية سريعة ومميزة ما ببتخيلوا موجودة بالضيعة متل الكيسادياس وقصص هيك مهضومة بتعبي الراس وأهم شي إنو البطاطا عندو مش شربانة زيت. فعلاً هل محل إسم على مسمى، الكمية كريمة، أكل محضر طازة كل يوم من إيدان أهل الضيعة مع مأكولات متل البيتزا والكلاماري وغير أكلات ما بتتفوت. كل هيدا بمنطقة خضرة وهادية بتتميز بقعدة حلوة وبرود. هون فيكن تستمتعوا بجو حلو وكاس مشروب على رمرمية.
الرقم: 227 350 26
َلك مين قال بالقبيات ما في أكل تلياني على الأصول؟ هل ضيعة مخباية قصص ما بتتوقعوها. مشوا معنا على مطعم زهرتوني على طريق مار شليطا. طوني زهر إنسان بيعشق الحياة والباستا وضيعتو القبيات، كرمال هيك قرر يجيب طعمات إيطاليا على قلب الضيعة. القعدة بهل محل بترد الروح وصدقوا هل ضيعة من أجمل ضيع لبنان بطبيعتها الإستثنائية وأكلها الطيب. بتجوا بتقعدوا بهل محل الموجود بغابات حلسبان، بين الشجر والوديان، مطرح ما رح تحسوا حالكن بحلم. عند زهرتوني رح تاكلوا باستا شهية معمولة على الإيد، بشغف وحب وفن مع خلطات سرية وطعمات متنوعة وشهية.
الرقم: 844 469 81
٥. ديوان الوادي
على كتف وادي حلسبان قاعد مطعم ديوان الوادي لي بيتميز بطلة حلوة عالطبيعة وبأكل ولا أروع. هل مطعم الحلو مخبى بين الشجر والطبيعة الحلوة بيقعد على الوادي وقريب من مزار مار شليطا الأثري وعندو قعدة رواق على الآخر ولقمة كتير طيبة لتستمتعوا بمشواركن. ديوان الوادي بقدم أطيب المشاوي وكمان الكتير من الأكلات اللبنانيي لي قلبكن بحبها متل الكبة المشوية على الطريقة القبياتية لي بتجي مرفخة ومليانة حشوة لتاكلوا صابيعكن وراها. أما إذا عبالكن تجوا تحتفلوا بمناسباتكن العائلية أو تعملوا جمعة كبيرة بمحل ببيض الوج، هل مطعم هوي عبارة عن بيت المأكولات اللبنانية بالضيعة رح بقدملكن كل أطباقكن المفضلة ويعملكن جو غير شكل.
على: 519 488 03
٦. مطعم الضيعة
للأكل الطيب حكاية خاصة بالقبيات، بس توصلوا على أول الضيعة فرقوا على مفرق غوايا وكفو على مطعم الضيعة. هل مكان كتير مميز ورائع لتقضوا نهار مميز وتستمتعوا بأجمل إطلالة على الجبال الخضرا والمناظر الرائعة. بتقعدوا على الكراسي العتيقة وبتاكلوا أطيب لقمة بيتوتية. وما بتكمل الجلسة إلا بأطيب أكلة كبة شمالية مع صحن مشاوي غير شكل من الضيعة وسمك مشوي ولحمة نيّة على مد عينكن والنظر. فيكن كمان تجوا تتمتعوا بأطيب ترويقة غير شكل من حواضر الضيعة.
اتواصلوا معن على موقعن على فايسبوك.
٧. مطعم المرغان
مين بيعرف قدي القعدة حلوة من المرغان؟ أكيد ولاد الضيعة بينطروا من سنة لسنة الجلسة بالمرغان ليستمتعوا بالقعدة على راس الجبل ويشموا هوا نضيف وياكلوا لقمة طيبة جبلية ما في منا ببيروت. الجمعة الحلوة إلها سر، والسر هوي النفس الطيب على الأكل وهيدا المطعم معروف بيعمل العجايب بالأكل وبخليكن تستطعموا بكل لقمة وتستمتعوا بكل نسمة.
الرقم: 403 324 03
لتعرفوا أكتر عن القبيات، محضريلكن دليل سياحي لإذا حابين تزوروا هل منطقة المميزة: مشوار على ضيعة القبيات، ٢٤ شغلة تعملوها بهالمنطقة.
