٧ من أشهى الأكلات الشعبية بضيع الجنوب

من بعد ما خبرناكن عن أكلات شعبية من مختلف الضيع اللبنانية، قررنا نسلط الضوء على منطقة الجنوب! خلينا نزور شوي الأكل اللبناني الجنوبي ونعرف تفاصيل اكتر عن بعض الوصفات المشهورة بضيع الجنوب ويلي بتفتح النفس.

١- مجدرة حمرا

من أحب وأطيب الأكلات على قلوب الجنوبيين، وهي عبارة عن عدس بيتقلى مع البصل حتى يتحمر، وبعدين بينحط البرغل وبينترك على نار هادية لتستوي.

٢- هريسة

هريسة القمح والدجاج بتتألف من حبوب القمح مع الدجاج، وهو طبق تقليدي بالجنوب بيأخذ وقت طويل بالتحضير.

٣- كعك العباس

بتنعمل بأشكال القرص أو الدائرة و هي عبارة عن عجينة من الطحين والسكر واليانسون، مع العقدة الصفرا، السمسم وجوزة الطيب.

٤- كمونة البندورة

بشوفو حالن أهل الجنوب بطعمة الكمونة وهي مزيج من الحبق والمردكوش والنعناع والكزبرة والحر الأحمر مع الكمون المطحون والقرفة والملح والفلفل. يضاف عليها البرغل و البندورة المطحونة بالخلاط، مع زيت زيتون ونعناع ورشة ملح.

٥- كبة العدس الأصفر

كبة نباتية كتير طيبة، بتنعمل من البرغل والعدس المجروش و البصل والبقدونس، و بتنخلط مع معجون البندورة ودبس الفليفلة والكمون والفلفل الحلو والحار والأبيض والملح. بعد ما نحط فوق البرغل والعدس المجروش التتبيلة، مندعك بالمكونات ومنعجن مع البقدونس ومنبلش التشكيل.

٦- حلو ليالي لبنان

بيتحضر هل الطبق من خليط من الحليب، طحين فرخة، سكر، و ماي الزهر بطنجرة كبيرة على النار ليستوي. بس يخلصوا بيتقدموا بأطباق وبيتزينوا بالفستق الحلبي وزهر الورد و القطر إذا عبالكن.

٧- الفراكة الجنوبية

و هي عبارة عن لحمة العجل النية أو الكبة النية المعروفة بالملسة بالجنوب، مع البصل المفروم وبتندعك بالإيد بجاط مع زيت الزيتون. وبتصير أطيب لما بتنضاف لخلطة البرغل و الكمونة الجنوبية.