اتعرفوا على ٦ معالم تاريخية منسية ومخباية بقلب بيروت

بيروت هي المدينة العريقة يلي شهدت على تاريخ مختلف من الحضارات والإمبراطوريات. هيدي الميزة جعلت من بيروت مدينة مخباية وغنية بمعالم تاريخية لازم نرجعلها و نزوروها من أول وجديد. اكتشفوا معنا ٦ مباني تراثية ومعالم تاريخية بالعاصمة بيروت منأكدلكن انو حتى كتاب التاريخ مش مخبركن عنها.

١- مقر سكن شارل ديغول

الجنرال الفرنسي سكن بهيدا المكان من ١٩٢٩ ل ١٩٣٢ وهلق بتلاقوا مقر السكن محفوظ كمعلم تاريخي. هوي صوب شارع مار الياس إذا بتحبوا تزوروا.

٢- بيت بيروت

بتلاقوا بيت بيروت بالسوديكو، ويعتبر من البقايا الأثرية للحرب الأهلية وحالياً محافظين عليه كمركز تاريخي وحضاري. فيكن تزوروا المكان وتحضروا معرض ألو، بيروت؟ لتتعرفوا وتشهدوا على تاريخ المدينة اكتر.

٣- المنارة القديمة

هيدي المنارة هي معلم تاريخي رائع تروحوا تتفرجوا عليه. مخبى بين البنايات القديمة والحديثة، تعتبر المنارة مكان مميز لتنسبطوا بالمناظر المطلة عليها.

٤- قصر تقي الدين الصلح

قصر مهجور وقطعة تاريخية لمحبي الاستكشاف والمغامرة. يعتبر من أملاك رئيس الوزراء السابق تقي الدين الصلح وهوي يلي عمروا بس حالياً بتمتلكه أرملته. إذا انتو قد المغامرة، زوروا المكان واسترجعوا التاريخ الغني.

٥- البيت الزهري

تعمرت الڤيلا ب ١٨٨٢على وقت العثمانيين ، كما استضافت سياسيين وأسماء تاريخية كبيرة مثل الجنرال شارل ديغول، الفنان الأميركي العالمي جون فرن، والرسام البريطاني توم يونغ و غيرن. حالياً المكان تحت عملية الترميم ، بس مش معناتها انو ما فيكن تروحوا و تتفرجوا على المبنى الأثري وتتعرفوا على تاريخه اكتر.

٦- القصر الجمهوري السابق

القصر الجمهوري السابق هوي مبنى مهمش بتلاقوا على تقاطع برج المر بمينة الحصن. كتار بيمرقوا حد هالمبنى الأثري بس الأقلية يلي بتعرف تاريخه العريق. سابقاً كان القصر من ممتلكات بشارة الخوري وهو أول رئيس جمهورية للبنان ، وبعدين صار للرئيس كميل شمعون وقت رئاسته. بعد الرئيسين الخوري وشمعون ما عاد سكنوا المبنى اي حدا حتى بالآخر رفيق الحريري اشتراه بال ١٩٨٠.

حبيتوا هالمشوار التاريخي؟ شوفوا كمان أبرز المتاحف والمواقع الأثرية لي فيكن تزوروها اليوم ببلاش بلبنان