صار في عرس بمغارة جعيتا… شوفوا القصة معنا

شي مرة شايفين عرس بقلب مغارة؟ لتوصلوا على قلب مغارة جعيتا لازم تمرقوا من شلال كتير حلو.

نحنا وعم نبحبش على إنستاغرام شفنا عرس ساحر الجمال بمغارة جعيتا بين الآثارات وبقلب المي: العريس والعروس واقفين وماسكين إيدين بعض، شي كتير حلو ويمكن هل عرس ما رح تشوفوا متلو بأي محل بالعالم بقلولو “عرس الأحلام”. تطلعنا حوالينا لقينا شموع وورود وزينة ولا أحلى من هيك!

شفنا هل صور على إنستاغرام ولوهلة حسينا بإنو هل عرس حقيقة، بس رجعنا حكينا مع مهندس الديكور إيليو عطالله وسألنا عن هل صور وخبرنا القصة.

قلنا إنو هل صور للأسف مش حقيقة وهني من نسج الخيال بس هني جزء من مشروع إعادة ترميم صممها المهندس إيليو عطالله بنفسو لعدد من آثارات لبنان متل مغارة جعيتا، قلعة بعلبك، وقلعة جبيل.

صراحة شفنا شو عمل بقلعة جبيل، شي كتير حلو بيعطي حياة للمكان: برك مي وحمام بخار، وقصص بتخليكن تسرحوا بخيالكن.

مشروع إعادة الترميم نعمل بالعديد من دول العالم والناس حبت كتير الفكرة بس متل ما بقول إيليو أهم فكرة بالموضوع المحافظة على الآثارات وعدم التسبب بضرر والحفاظ على الموقع بشكل صحيح.

عم يطرح إيليو المشروع ضمن حملة وزير السياحة وليد نصار “أهلا بهالطلة” بالتعاون مع Live Love Lebanon لي هدفها تشجيع السياحة الداخلية والتحفيذ على زيارة المواقع الأثرية.

صراحة هل فكرة كتير حسيناها مهضومة وجديدة وغريبة من نوعها، إذا طبقت بشكل صحيح ودقيق أكيد من دون المس بالقطع الأثرية والأحجار التراثية. أول مرة منشوف هيك شي بلبنان!

شو رأيكن بهل فكرة؟

شوفوا كمان: تعرفوا على أغرب العبارات الشعبية اللبنانية وأصولها.