٩ دروب مشي خريفية بياخدوا العقل بلبنان
ما في أحلى من الضهرة بالطبيعة بالخريف لما يكون الطقس برود وحلو. لهيك جمعنالكن ٩ مشاوير لازم تروحوها إذا بتحبوا المناظر الخلابة وشم الهوا النقي.
١. شلالات يحشوش، نهر ابراهيم
من أكتر الشلالات جمال وسحر بلبنان، مغمورة بشجر الصنوبر والبلوط والأعشاب الخضرا، والتمشاية فيها بهيك طقس بترد الروح رح تنسيكن كل شي في مشاكل وضجة.
اكتشفوا عالم شجر اللزاب الموجود بهل مناطق البقاعية، لي بزورها بشوف جمال شجر اللزاب المعمرة لي تعمر منها هيكل سليمان. خضار ورواق…شو بدكن أحلى من هيك؟
٣. محمية حرش إهدن، إهدن
بتحبوا الطبيعة، الرواق و الجو الحلو؟ حابين تتفرجوا على ألوان الخريف؟ ضروري تتنزهرا بهل غابة وتشوفو المنظر والأوراق المتساقطة!
٤. وادي قنوبين، بشري
من أعمق وأجمل وديان لبنان. اكتشفوا هالمنطقة المليانة بريحة البخور، المواقع الأثرية والمغارات المحفورة بقلب الصخر المشرفة على نهر الوادي يلي بتعود للعصور الوسطى ولي كانت الملجا الأمين بزمن الإضطهاد. بتاخدكن رحلة بالوادى المقدس على عالم منعزل وهادي بعيد عن الهم والغم. استفيدوا قبل ما تجي الشتوية وتصير الطريق صعبة.
٥. وادي الصليب، كفردبيان
اكتشفوا جمال الطبيعة الخضرا ببلدنا من هل وادي، تمشوا لتوصلوا على الجسر والبيوت المهجورة التاريخية بالوادي، كفوا على النهر وروقوا أعصابكن على الآخر بهل درب الرائع.
٦. غابة العزر، القموعة
بزيد فصل الخريف على جمال هل غابة جمال، بتتميز بسحرها الطبيعي وجمالها لي ما بينوصف وبشرجها متل السنديان، العرعر والأرز والسرو لي عمرها فوق آلاف السنين. تمشوا بالغابة بهل وقت ورح تشوفوا لوحة فنية دهبية، لابسة وراق الشجر ألوان الدهب والأصفر الحزين.
٧. غابة بكاسين، جزين
اكتشفوا غابة الصنوبر الكبيرة بجزين! تمشوا وتنشقوا الهوى النقي وشوفوا جنة الصنوبر لي ما بتخلص ولي بتجمع الجمال والخضار والمناظر الخيالية، المتميزة بطبيعتها الهادية وبمناخها المعتدل، المتوجة بأزلية اخضرار صنوبرها والزيتون.
٨. غابة أرز حدث الجبة، بشري
تعتبر غابة حدث الجبة من أندر الغابات لي بتحتوي على أجمل الأحجار الحجرية متل الأرز واللزاب والصنوبر والعفص والقطلب والغار والحور والسنديان والمحلب، وأكتر من 300 ألف شجرة وشجرة. أصلاً حدث الجبة ضيعة كتير خلابة، فيكن تتمشوا فيها وتنسوا حالكن بالطبيعة وفيها كمان كنايس أثرية، شي خيالي.
٩. برك فالوغا، بعبدا
كزدروا مشي على المحمية وتأملوا تفاصيل أرزاتها الزغيرة والمعمرة، وممراتها الضيقة والمنحدرة وشموا رايحة هواها المجبول بالتراب وخشب الأرز على أنغام الطيور الجميلة وتأرجوا على برك المي الروعة لي رح تشوفوها عن قريب. المنظر بس تغيب الشمس شي بياخد العقل!
شوفوا كمان، ١١ أماكن خريفية بتطير العقل بلبنان.
