هيك فيكن تقضوا نهار من العمر بقرية قرنعون

اركبوا السيارة واطلعوا على قرية قرنعون Arnaoon Village بالبترون. أول ما توصلوا رح يجي حدا يدلكن وين فيكن تصفوا السيارة وأكيد بدكن تكونوا حاجزين قبل بوقت لأن المحلات محدودة.

بتفوتوا بتلاقوا بيت حجر ومنظر كتير حلو قبالكن متل شي ضيعة من الأحلام، بتبلشوا بالترويقة اللبنانية الأصيلة: لبنة، جبنة، مناقيش، بيض وحلو وقصص طيبة كتير.

رجعوا شوفوا الحيوانات الأليفة بقلب الحديقة الزغيرة وإذا معكن ولاد رح يتسلوا ويبرموا، حتى في أحصنة كمان إذا حابين تجربوا ركوب الخيل.

ما تنسوا تتفرجوا على الطبيعة الحلوة وتصوروا.

هالمشروع حلو للعيلة كلها – من الزغير للكبير! وأكيد رح تغيروا جو بالطبيعة وبين شجر البلوط!

حتى إذا كانوا الولاد تحت الأربع سنين في إلن نشاطات خاصة فين والأكبر كمان عندن نشاطات مهضومة لعمرن.

بس تخلصوا من الحيوانات، بتروحوا تشوفوا النشاطات الرياضية والألعاب.

في قسم مخصص للألعاب الرياضية متل الزيح والحبل لي بيمشي بالوادي وقصص فيها تحدي بس ما تعتلوا هم في حدا بقلكن كيف تمشوا وبضل معكن وأكيد ما بصير شي.

فيكن تعملوا كارتينغ Karting وترجعوا تلعبوا دق بايبي فوت.

صار وقت الغدا ولازم تاكلوا أطيب أكل من مختلف الأصناف المازة والأكل اللبناني التقليدي مع تحلاية غير شكل وصحن فواكي وبالعادة بكون في حفلة موسيقية إنتو وعم تتلذذوا بالأكل: شي كتير حلو.

مجرد تخلصوا أكل حملوا حالكن وروحوا تمشوا شوي بهل قرية وشوفوا كل شي مخبايتو.

وكمان من بعد الغدا فيكن تشاركوا بالألعاب مع فريق الanimation مع ولادكن.

رجعوا تفرجوا على الجسر لي تحتو مي وسمك، فيكن تشوفوا السمك تحطولن أكل.

خلص النهار وعملتوا قصص كتير مهضومة، بس بعد ما شبعتوا من هل محل؟ فيكن تناموا بقلب المشروع بقلب الشاليهات الحلوين وتقضوا ليلة من العمر.

كل النهار نشاطات وألعاب وأكل طيب ما بتزهقوا وصدقوا رح يقطع الوقت بلا ما تحسوا!

كمان هيدا المحل فيكن تحتفلوا في بمناسباتكن الخاصة والمميزة.

بالنسبة للأسعار، فهيي على الشكل التالي:

من الاثنين للسبت: 50$ على الكبار و25$ على الولاد (من 3 – 12 سنة)

الأحد وإيام الأعياد: 60$ على الكبار و30$ على الولاد (من 3 – 12 سنة).

للحجز والمزيد من التفاصيل، اتصلوا على: 502 342 03

شوفوا كمان، سافر بلبنان: قضوا نهار من العمر بضيعة بيصور.