بالفيديو: معرض ألو بيروت عم يرجعكن لإيام الزمن الجميل (الدخول مجاني)

“ألو ألو ألو بيروت من فضلك يا عينيي عطيني بيروت…”

بهيدي الإيام، صعب علينا نشوف قديش كانة حلوة بيروت وقديش نزعوها الزعران. معرض ألو بيروت لي فتح بالسوديكو جمعلنا أحلى صور من لبنان إيام اللولو، على أمل إنو يرجعوا.

ألو بيروت رح يرجعكن لإيام الزمن الجميل ويخبركن عن تاريخ بيروت لي ولا مرة انحكى.

أول ما تفوتوا على هل معرض رح تشوفوا الصور العتيقة، التحف الفنية، القطع الأثرية، موسيقى إيام الستينات وطريقة حياة البيروتية بالستينات.

صنع هل معرض على إيدين ١١ صحافي و١٠ فنانين يلي تعمقوا بالبحث عن تاريخ بيروت ولي عبروا عن علاقة كل لبناني ببيروت.

زوروا الملهى الليلي”Cave du Roy” الأكثر شهرة إيام الستينات ويلي كانوا يجوا علي الناس من أوروبا ليعيشوا ليلة وحدة ويرجعوا يفلوا. شوفوا السهرة بهل نادي كيف كانت وعيشوا هل تجربة البيروتيي بفضل سينوغرافيا مبتكرة وتركيب صوتي بيعتمدوا على مقابلات وموسيقى من الستينيات.

بعد ما تشوفوا بيروت الزمن الجميل، في قسم مخصص لبيروت اليوم وكل المآسي لي عم نعيشها.

وفيكن كمان تعملوا قصة شعر مجانية عند صالون افرام، بس ما تنسوا تقولولن يقصولكن شعركن على الموديل البيروتي العتيق.

وبس تخلصوا ما تفلوا قبل ما تفوتوا على هل أوضة الزغيرة وتحكوا بيروت شي من القلب وتخبروها شو حاسين وتخبروا قصتكن مع هل مدينة على التلفون من خلال رسالة صوتية بتتسجل وبتصير جزء من أرشيف بيروت.

وهيك بتصيروا إنتو كمان جزء من بيروت مش بس هيي جزء منكن.

شوفوا معنا بهل فيديو كيف كانت رحلتنا على معرض ألو بيروت…

هل معرض بيفتح من الأربعا للأحد من الساعة 12 الضهر للساعة 8 بالليل ولتعرفوا أكتر، اتصلوا على 746 746 01